道頓堀御好燒專門店 (新城市廣場) (已結業)

今日小编同男朋友去咗沙田行街，唔知大家会唔会都有一种想去旅行嘅感觉呢？小编同男朋友最钟意就系日本，可惜今年疫情严重，睇怕都有一段长时间去唔到了。今日我哋就试咗道顿堀御好烧专门店，原来午餐时段有好多选择，而且价钱十分之平易近人，但同晚餐单点嘅份量系一样嘅。我哋已经好耐冇食过大阪烧之类嘅食物，于是我哋分别叫咗豪华御好烧，有得煎蛋之余仲有拉面。卖相十分之吸引，配料丰富，有一种幸福嘅感觉。成个过程都十分之容易操控，店员好细心咁指导我哋，亦都有比教学图片我哋睇。成个过程大概15-20分钟左右，主要都系反转大阪烧。男朋友仲好细心咁煎咗个心形出嚟，系DIY嘅不二之选。酱汁系甜甜地嘅烧汁，亦都有沙律酱，紫菜同木鱼碎可以任落，啱晒我依个紫菜控。大阪烧嘅味道十分之好，同我哋喺日本食嘅味道相近，而且只系$80 ，绝对系抵过晚餐好多。大阪烧亦几大份，有好多配料，鱿鱼好惹味，同大阪烧十分之夹。总括而言，呢一间餐厅嘅午餐系十分之高质，而且亦都可以俾你同朋友DIY一齐整属于自己嘅大阪烧，好玩得来味道又唔差。