紅館 (擺花街) (已搬遷) 新店位置

今日约咗旧同事食饭。自从离职后，几个月冇嚟过中环区了。约咗同事喺石板街等，佢带我去红馆，系新开嘅，之前无嚟过。餐厅入面大部分都系吧台位，原来下面仲有一层，不过今日已经全部爆满，所以我哋就坐上层嘅吧台。午餐都有几多选择，今日就试个牛肉三文治啦。午餐包沙律或餐汤，天气太热喇，唔想饮啲热辣辣嘅汤，就拣咗沙律。虽然话系午餐，但沙律嘅份量都唔少，沙律菜好新鲜，上面仲有一啲白色嘅酱，食落口味道有啲似薯蓉，加咗柠檬汁，酸酸地，但系都几好味。牛肉三文治唔算好大分，伴碟有我最心爱嘅粗身薯条，薯条系要切得粗啲去炸先至够味道。三文治原来系用法包，入面夹咗啲青瓜同牛肉，青瓜味道酸酸地好醒胃，牛肉系切成幼条状，方便食用，唔会食得好论尽，真系要赞一赞。粗身薯条可能用牛油煎过，非常非常好味，食完一条又一条，食个唔停口。最后当然叫咗杯冻柠檬茶。虽然话饮得多冻野无益，但夏天唔饮冻嘢，真系受唔住㗎。可惜而家唔再系中环区返工，如果唔系一定会再嚟红馆食过。