七月餐室 (已結業)

星期日晚７点同小朋友上完兴趣班，揾地方晚饭。行返去德福又惊太多人要等位，经过健力见倒呢间餐厅几新净光猛，仲重要唔驶等位，就入去试下。啲位都几阔落，起码枱同枱之间唔驶侧身行入去，唔洗惊啲人行过撞倒小朋友。我地嗌左个泰皇咕噜肉、西兰花青衣鱼柳同埋虾酱蒸猪颈肉。泰皇咕噜肉酱料酸甜度刚好，又唔会咬落净系粉，啲肉唔鞋，好好食。仲要冇骨，啖啖肉，岩晒小朋友。西兰花炒青衣鱼柳呢间野都几揼本，食材几好，唔系一咬就烂果啲鱼。仲有少少菇加埋一齐炒，值得一赞～虾酱蒸猪颈肉一上枱就好香虾酱味，猪颈肉爽口有口感，最惊喜竟然系有粉丝垫底，就甘睇菜名唔知道有粉丝。建议餐厅可以加返落去。例汤都足料好饮。小朋友饮晒成碗。总括黎讲，一家三口晚餐HKD250有找，坐得舒服，味道又几好，CP值真系高。见倒墙身有漏奶华相片介绍，好吸引，下次去要试下先得。