吉豚屋吉列豬扒專門店

营业中

休息中

是日到荃湾去接朋友仔收工， 喺经济低迷嘅情况底下，都系锡住荷包仔好啲，但又唔想求求其其又一餐， 就试下cp值高嘅吉列豚饭喇！两个人食到撑住肚走都只系一百头咋！我点嘅系招牌滑蛋吉列豚肉饭（49蚊），卖相就无咩特别， 上台时都仲热辣辣，豚肉size都有手掌咁大， 表面炸得色泽金黄香脆，唔会油腻，豚肉质感都还可，少少juicy又唔会干。滑蛋部份有小惊喜，因为佢熟蛋之中保留左生蛋黄， 搞匀拌饭食几有日本风味， 加埋有烧汁同洋葱， 都算几惹味，但当然就谈不上惊艳喇！至于朋友就点左吉列三重奏便当（65蚊）， 有炸虾、炸鸡、炸猪，配有三种酱料，嘴刁嘅朋友话虾麻麻，似用梳打粉发过， 其他炸物表现尚可吧！反而啲椰菜几新鲜清爽，配醋汁食不错，岩晒用嚟解腻，整体嚟讲，三重奏配埋饭及汤嘅份量几多，女仔好难一个人食晒，所以CP值系高嘅！埋单时仲见好多人排队等外卖，外卖仲有85折添， 呢啲抗疫优惠真系难得。