Fish & Chick (高街) (已結業)

有时觉得自己真系个怪胎，明明唔食鱼（ 细个家长日时阿妈成日向老师投诉我唔食鱼大颈泡😆），但系就超钟意食日本鱼生，银雪鱼，盐烧鲭鱼，早排过海做完嘢，仲专登走咗去食 fish and chips。呢度嘅 set lunch 包括头盘，主菜同饮品，头盘四拣一，我拣咗店家推介嘅炸鲜蘑菇沙律，沙律菜份量颇多，炸蘑菇则有两大粒，望落去好似好干身，点知一咬落去，感觉非常 juicy😮，成粒菇炸得既香脆又能够锁住入面嘅水份，非常高质👍。主菜五拣一，虽然睇评论好多人话烤鸡好好食，但系我就当然拣 fish and chips 啦。炸鱼都有四种选择，对于我呢啲唔识鱼之人，拣平拣贵其实都食唔出咩分别😂，所以就拣咗最平嘅纽西兰蓝鳕鱼。首先要赞下块鱼柳真系又大又厚，肉质好嫰滑，配埋柠檬汁同埋粗盐一齐食，非常鲜味；底下啲薯条系我最钟意嘅粗薯条，薯味浓，炸得好脆又唔会油淋淋，好食。食完个午餐，硬系觉得好快会喉咙痛出唔到声，不过，就真系觉得好满足，好回味🤗。