Isaac Toast (新城市廣場三期) (已結業)

今次就点左MVP辣鸡吐司，好足料同埋味道几好。 因为疫情嘅问题所以就选择左外卖服务，而且没有失望。吐司嘅表面搽上薄薄嘅牛油所以令到吐司嘅颜色非常之靓同埋食落去嘅口感非常松软。本身以为啲鸡会系鸡扒或者炒鸡柳之类不过原来发现系一块鸡肉汉堡。鸡肉汉堡嘅味道都几平衡带少少嘅白胡椒粉味都几香，不过鸡味就唔系好重。椰菜好新鲜，好适合平衡返吐司本身嘅腻。不过就唔系好试到粟米蛋同埋车打芝士嘅味道，可能因为酱汁都盖过咗两样嘅味道。中间亦都夹有泡菜同埋酸瓜，不过我就觉得味道好甜有少少抢咗其他配料的味道。酱料嘅配搭亦都唔错，不过都系偏甜。甜辣酱同埋芥末酱都令到吐司非常开胃唔会觉得有油腻嘅感觉。总括嚟讲多士嘅味道非常之好，好香口好开胃，而且所有配料夹埋一齐系非常之夹。不过味道就真系偏甜如果不太喜欢食甜嘅人可能未必太钟意。份量都好十足当午餐都会非常之饱。中午嘅时段来人流都算多，所以等候嘅时间都会偏长。而且所有多士系即叫即做所以如果赶时间就未必系一个好选择。不过就胜在够新鲜，够热。今次就等左差不多20分钟，整一份三文治来讲时间都算长。总括来讲今次第一次嘅体验都算几好，期待下次返嚟再试佢哋嘅经典&皇牌产品！🥪🥪🥪