佳人餐廳 (已結業)

无甚特别的门面,引起我注意反而系有少少浪漫又好似好搅笑的名字... 佳人餐厅.每次经过都好匆忙,所以我一直以为只系一间普通茶餐厅; 终于有次停低睇睇,原来出名pizza,再上网睇下食评又好似好得㖞,于是有日去界限街打波前拉队一试.餐牌上有近三十种pizza,仲有套餐选择; 叫个四人餐,有一大一细pizza,一个焗饭和一个小食.小食先上台 - 椒盐豆腐. 碟头比想像中大碟,大大粒豆腐几惹味,不过几辣...焗类拣千层面. 哗,油到爆... 都知道焗类一定多油,但拎旧放系只碟度我以为自己做紧劳作油紧颜色,成只碟即刻有层反光红色...主菜两个pizza,大批系海鲜 - 批底够松化,边够脆; 海鲜主要都系鱿鱼&微型青口,再加几只虾. 芝士同酱都够多,味道唔错.细批拣个佳人pizza,个馅主要系茹类,唔系好记得内容,因为大家一致认为个海鲜批较好食.个餐一百蚊有找,质素唔差; 食得连锁店的pizza多不妨试下食这类小店,又会有另一番风味.