芝味鳥

营业中

休息中

屋企人叫咗Pizza Bird外卖，佢哋前身系Pizza and Chicken，近年先改名做Pizza Bird。落单后约个半小时先送到，不过当日系繁忙日子，都可以理解。芝味B餐，海洋风情大批一个、香草烤鸡螺丝粉一客、炸鸡三件、汽水三罐。海洋风情大批馅料系鱿鱼、虾、蚬仔、蟹柳、洋葱、青椒、菠萝、芝士同千岛酱，种类虽多，份量就几少，零星咁分散晌薄饼表面，千岛酱食味偏甜，唔同坊间甜中带酸嘅味道。香草烤鸡螺丝粉，记得早年仲系叫Pizza and Chicken𠮶阵食到嘅酱汁系满满香草味，可惜呢次食味稍淡，就似一般茶餐厅颓式白汁，螺丝粉亦较腍身。炸鸡方面，色泽颇深，似乎炸得过火咗，表层炸浆亦唔薄，食落肉质干身，比仍系Pizza and Chicken初期失色好多，但就比K字头炸鸡店算系好啲啲，至少食得出调过味同仲系热辣辣嘅。另外跟餐可以拣汽水、餐汤或蒜蓉包，落单𠮶阵话要汽水，一般餐厅都会俾百事可乐（或可口可乐），但当日佢哋随机俾咗7up同Mirinda青苹果味，所以落单时真系要讲明想要咩口味嘅汽水，以免出现唔啱饮嘅情况。