一盛極牛 (已結業)

知我鍾意食拉麵，有朋友專門介紹我地黎食呢間，話湯底同和牛都好正。星期二晚去到座無虛席仲要排隊，仲見到有日本家庭去食。店入面空間幾闊落又夠光，仲望到師傅整麵同燒牛肉，加埋D香味真係越睇越餓！兩款拉麵選擇 – 極牛拉麵同白牛拉麵，都係牛骨醬油湯底，白牛則係再加上白松露。落單好貼心，每個配菜都可以揀份量，湯底濃淡同麵嘅硬度都可以揀，好tailor-made。可借太夜去到已經冇哂和牛刺身，試唔到。極牛拉麵牛骨湯配合醬油味道，令成個湯底好濃郁，拉麵煮得幾彈牙，夾埋木耳絲同荀食落更加爽口，味道好豐富。主角灸燒和牛色澤真係超靚！微微燒過表面，入面仲見到粉嫩嘅肉色，入口有牛油香但唔會覺的油膩，越咬牛味越濃，用和牛味道果然有保證。白牛拉麵配料以及拉麵都同極牛一樣，唯一唔同係白牛湯底加左白松露，一黎已經聞到松露嘅香氣。初初飲落松露味道好突出，慢慢牛骨湯嘅清香會滲出黎，個人更喜歡白牛湯底，好有層次。好想問下老闆係用咩蛋，總覺得食落好軟滑，仲有好特別嘅香味，好好食！講真拉麵價錢唔平，不過用高質和牛加上有心機嘅出品，個人覺得值得，食得好滿足！