Rabbitland Cafe

营业中

休息中

我好钟意兔仔，自己都有养，东京下北沢嘅兔cafe亦有去过。我唔会期望喺铜锣湾搞兔仔cafe可以好似日本咁，始终香港个土地问题你我都知，但我真系好失望，坐咗20分钟左右忍唔住走咗。第一，如果系有预约制，咁即系其实都方便员工去控制每个时段嘅客人数目，但我见员工系好似地铁𠮶啲咁入得就入，个场地每张枱仔中间差不多系完全无空间。如果大家只系全程坐喺度食，呢个好似放题餐厅嘅密集式摆法系无问题，但嚟得嘅就会想行出去睇吓喂吓兔仔，走动时，行𠮶个辛苦，坐喺度𠮶个又会俾人踢到，小朋友心急啲的话随时PK。解决嘅方法好简单，你全场摆少一两张细枱，或者改做摆放多一两张大枱，确保即使满坐，客人都有空间走动，成件事安全同舒服好多。第二，其实养开兔嘅人都知，兔仔系钟意安静，太多人同一时段咁嘈住，对佢地都唔系咁好。我好明白开业唔系好耐嘅cafe，系会想做得就做，有客就入，但个客嚟到，佢嘅感觉同experience都好紧要，我都相信个owner系真心钟意兔仔，但个硬件配套方面绝对要改善。