TwoTwo Chicken (已結業)

TwoTwo Chicken，佢哋晌韩国有三十几年历史，可谓元祖级嘅韩式炸鸡店，近日仲晌港岛区开咗香港首间分店，估唔到选址竟然系沉实嘅小区 – 大坑。舖面面积唔大，水吧位已占一大半，装修似酒吧多过炸鸡店。餐牌暂时只有一版两面，主菜就系六款口味嘅炸鸡，另加三款韩式料理，反而饮品嘅选择仲多少少。试业期间所有口味嘅炸鸡全只$148，半只$78一碟，呢日就试咗其中几款。香葱炸鸡，表面嘅秘制酱汁食落有啲似蜜糖芥末（只系我觉得，无求证系咪真系加咗蜜糖芥末之类嘅调味料），上面嘅葱丝既可提味，又可减去炸鸡嘅腻感。甜辣炸鸡，酱汁甜中有辣，同埋几有辣劲，都几惹味嘅。呢两款炸鸡外皮虽然蘸咗酱汁，不过都仲有啲脆度。麻辣炸鸡，呢款系香港店独家口味。麻辣度OK，唔死辣同埋几香口，只系鸡件有啲干身。