牛の鍋日本料理

营业中

休息中

嚟到呢间晌荃湾悦来坊嘅餐厅，试咗$228一位嘅日本料理+火锅+甜品放题，另外仲有比较平嘅火锅+甜品放题，限时系两个钟，唔同时段收费都略有不同。自助火锅料有生菜、番茄、冬瓜、南瓜、粟米、冬菇等。另有仲有啲比较饱肚嘅乌冬、即食面等。饮品都系自助嘅，当晚有常见嘅汽水、韩式饮品同道地纸包饮品，酒精类嘅就有jolly shandy等。另外仲有个toppings corner，放满咗朱古力豆、彩针、迷你棉花糖、朱古力浆等，可以自己帮啲甜品装饰一下。拎完同叫完嘢食，就起动喇！精选豚肉嘅脂肪同肉嘅比例平均，口感松化，日本广岛蚝蚝身算胀卜卜几鲜味。自助火锅料嘅火炙芝士丸质素几高，乌冬就烟烟韧韧咁。刺身有十款左右，我哋试咗三文鱼、八爪鱼、墨鱼同甜虾，三文鱼几肥美。烧日本番薯仔一啖一口味道几甜，串烧日本鸡软骨微咸脆口，串烧菠萝就又甜又多汁。盐烧牛舌爽嫩有牛味。最后仲食埋甜品，软雪糕系用雪糕机唧出嚟𠮶种，等侍应拎到嚟之后就可以自己去自助吧加toppings，质感软滑。杨枝甘露嘅密度比一般糖水舖高，入面仲有西米、鲜芒果粒、柚肉等等，酸酸甜甜都唔错。