唔少人好鍾意得閒就過一過澳門，飲飲食食咁又一日，one day trip都好，都叫做離開下香港去放個假咁，特別係澳門仲有咁多好嘢食，就更加等於去咗個美食團咁。嚟緊11月10-13號，嗰邊有個美食美酒節呀！又有個藉口畀自己過去食返日喇。
麗思卡爾頓亞太區美食美酒節今年已經係第5年喇，喺嗰4日入面，總共有成58個美食美酒嘅活動，全部都係酒店級嘅享受，而且仲可以食到米芝蓮3星廚嘅手勢添！
喺呢間傳統法式餐廳度食嘢，望住黑白裝修格局配雲石磚，再聽住樂手演奏嘅live music，應該幾有法國輕鬆浪漫嘅feel。而喺今次嘅活動入面，參加者更加可以享受到甜品大師同茶藝大師主理嘅下午茶，而特色晚宴嘅體驗仲會有米芝蓮3星名廚Regis Marçon坐陣添！橙酒火焰班戟、烤肉眼扒、奶油香煎比目魚等等嘅菜式都有得試。
去酒廊除咗飲酒，都仲可以食下啲佐酒小食或者下午茶嘅，就好似呢度咁，佢哋嘅煙三文魚配橘子果醬，同櫻花忌廉芝士泡芙一向都好受歡迎㗎。而喺活動嗰幾日，對酒有興趣嘅朋友就要留意嘞，酒廊有調酒體驗班、又有餐前酒、美酒等等嘅體驗時間，其中有啲仲係香港著名調酒師Antonio Lai負責添。
呢間中菜廳，淨係地理上都已經贏晒，事關佢係全澳門最高嘅中菜廳嚟，咁就可以一路食，一路俯瞰澳門嘅景色，夜晚食嘅話就更加好氣氛啦。至於食物方面，用嘅好多都係高貴食材嚟，好似法國藍龍蝦湯擔擔麵、藍莓紅釀無花果、蛋白蒸鮮蟹鉗、蜜燒西班牙黑豚叉燒咁樣，到時除咗可以喺度享受由米芝蓮2星名廚劉秉雷所泡製嘅午宴或晚宴之外，仲可以參加香檳品酒研藝班，學下品酒等等。
秋天係BBQ嘅季節，平時去啲燒烤公園或者燒烤場度BBQ都燒得多，今次可以嚟個高級BBQ，喺酒店嘅泳池邊燒嘢食！燒燒下又可以瞓下特大沙灘椅，都幾爽。
詳情
第五屆麗思卡爾頓亞太區美食美酒節
地點：澳門麗思卡頓酒店
日期：2016年11月10至13日
體驗項目：
星級廚師餐桌盛宴、特色午餐及晚餐體驗、星級下午茶、千載難逢的星級廚藝班、頂尖調酒師工作坊、專業品酒研藝班、群星早午餐體驗、池畔及酒店宴會廚房美饌體驗
隨時接收最新資訊
讚好OpenRice專頁！