往年呢啲時候，好多人都去咗泰國享受陽光與海灘咯，但而家未飛得住，惟有喺香港搵住泰國菜吊住癮先啦！泰國船麵都不失為一個好選擇呀！船麵湯底一般都加入唔同嘅材料熬煮，香味濃郁，而配料選擇亦非常多。今次開飯仔就為大家介紹全港唔同特色嘅船麵，每一間都各有千秋呀！
多料之選 篤篤船麵
圖﹕食船麵通常都得豬、牛、雞幾款選擇，但呢間餐廳嘅船麵就好似車仔麵咁，可以自選唔同配料，連牛柏葉、札肉、豬大腸、鮮蝦、鴨血等等都有，再配上泰式河粉或者金邊粉，變成一碗香港地船麵啦！
經典之選 船皇
圖﹕呢間船麵餐廳來頭唔細呀！1988年喺泰國起家，喺泰國已經有50幾間分店啦！湯底微鹹，味道濃郁，招牌菜嘅大大碗「船皇湯麵」，有齊晒雞翼、豬肉丸、豬腩肉、牛肉片等8款配菜，係豐富嘅！
米芝蓮之選 泰麵
圖﹕呢間泰國菜餐廳連續三年榮獲米芝蓮推介，船麵湯底用豬皮、豬紅、豬骨熬製，味道特別濃郁。不過配料先係重點！加入咗澳洲和牛片，半熟嘅牛肉嫩滑入味，索埋湯底嘅陣陣肉香，相當有層次！
抵食之選 阿叔泰麵
圖﹕自認係小鳥胃嘅話，呢間嘅迷你船麵就啱晒你啦！湯底用牛骨熬足12個鐘，肉香味甜！牛魔王記住揀牛肉船麵，牛腩牛丸都夠香。指定時段$15就食到碗泰版船麵，正常午餐晚餐時間，都係50幾60蚊碗，又好食又飽肚，性價比超高！
香濃之選 666泰船麵
圖﹕講得係「香濃之選」，當然係講緊佢哋嘅湯底啦！湯底加入豬骨、椰水同唔同嘅草藥熬煮，除咗甘草同八角等常見香料，仲加入咗兩種得泰國先有嘅草藥！湯底濃郁帶鹹香，主打豬肉船麵，有豬肉片、豬潤同腩肉，每一啖都帶有草藥嘅香味～
文﹕Kiko
