正所謂有危就有機，疫情之下有人離場也有人趁機擴張，旺角這間以黑色為主調的咖啡甜品店就是其中一間，單看外表絕對不會想到原來是由土瓜灣一間文青Cafe的班底主理！吸收過往的經驗，在「疫」市中開拓新路線。

 Black Coffee走簡約型格的全黑路線，裝修、擺設，甚至餐具都以黑色為主

Black Coffee創辦人Given介紹，新店的主題一如其名，就是黑色加上咖啡。黑色是對電影和攝影非常有興趣的Given自己的個人喜好之外，也是神秘、型格，還有隱藏於鬧市中的一份寧靜。說起來，姐妹店HeySoNuts也位於旺中帶靜的土瓜灣區呢。Given形容這次來到旺角開店是一個進步，無論是拍檔還是員工，都要給予他們晉升空間，因此相對穩定的HeySoNuts會放手讓員工打理，Given就安心投放更多心思在新店Black Coffee上。

做無法被取代的產品

「呢個疫情令租金下降，我哋有經驗覺得準備好啦，呢度有間吉舖，咁啱我哋又經過呢度。」Given笑說：「我哋都盡量用返過去經驗去做，呢個係好緊要，調返轉如果我哋無呢六年嘅經驗，我哋亦都唔會夠膽第一日就喺旺角開店，呢六年就係一個裝備。」這也是為什麼，縱然新店一改形象，但無論在招牌、Instagram等社交網站上，也標註著「by HeySoNuts」，Given指由零開始太困難了：「我哋既然有HeySoNuts呢個咁好嘅平台，就嘗試用下啦。雖然係有風險，但我哋都鍾意挑戰。」

有勇氣去冒險，除了天時地利人和，也得靠著一點信念，例如Given就堅持盡量自家製，不少原材料都是廚師用自己研究的食譜製作，咖啡也找本地烘焙師合作。「開一間餐廳，其實好在乎你賣嘅產品，係咪你自己嘅產品。」Given覺得，如果用的都是別人的出品，而不是自己的研發，其實很容易被取代。就算幸運地搶到頭啖湯，之後也會因為同類型的競爭而失敗。

 Ginger Moffle的Moffle是指麻糬窩夫，自家製作麻糬的時候加入薑，吃起來口感煙韌同時帶辛辣香氣

相信客人而不是Like數

Given觀察到新店一開有不少Blogger和Foodie來光顧：「因為而家互聯網啲嘢傳得好快，可能我哋只係喺Instagram上載一張相，佢哋見到張相覺得好靚，環境氣氛吸引咗佢。」但問到要怎麼在社交平台上宣傳，Given反而語重心長的說了一句：「社交平台好危險，危險嘅意思係你好容易被嗰啲Like蒙蔽。無論係你個Page定啲Post，將啲Like轉為錢係另一樣嘢。」這一刻你得到很多Like，不代表就可以立刻開分店，Given引用他認同的一種營運方式：「如果你想你嘅事業係一世嘅話，你嘅發展亦係一世咁嘅速度。」

不過營運方式也受大環境影響，Given坦言限聚令讓餐廳營商環境變得更差，不過同時也是個學習的機會：怎麼在減少枱數的情況下盡量維持營業額？每間餐廳的答案也許不同，而Given暫時找到的答案是相信客人：「我哋之前盡量都唔想限時，畢竟係咖啡店。但我相信我嘅食客，我相信佢哋明白而家嘅處境。」咖啡店限時後，也多了客人貼心地一次過點好所有餐點，讓流程變快，的確也有助讓營業額下跌少一點。

 中間的Peach Sparkling Coffee是咖啡師Daemon的Signature Drink，不加桃肉或桃味糖漿，以特別的咖啡加上梳打水撞出類似蜜桃的甜香

慢慢來比較快

「有好多不明朗因素，但我哋喺得香港扎根，就要去適應。」Given指，Black Coffee試業至今營業額逐漸開始符合預期。而比起急速上升，Given寧願慢慢來：「六年前HeySoNuts一開真係無生意，我哋都諗係咪開錯地方？土瓜灣無人行嘅？但三個月後一上就上到高位。點解知係高位？因為餐廳已經用盡啲位同人。咁去到高位會點？咪就係會跌。」

雖然不急於開分店，但如果又遇到好的機遇和舖位，會選擇經營HeySoNuts還是Black Coffee呢？Given也很誠實的說，單以包裝和市場推廣來說，Black Coffee的形象會比較吸引。但兩個品牌是感覺完全不同的感覺，HeySoNuts形象親民，適合家庭客人；Black Coffee裝修全黑，走型格時尚路線。當然，作為一間餐廳，Given最希望不止是包裝，而是用主打的咖啡和甜品來留住客人：「你碟嘢幾靚都好，如果唔好味就無意思，對於我哋嚟講呢六年都無變過。」

 創辦人Given和拍檔阿宇、Daemon，背後團隊也很多是從酒店出身，大家對出品都要求甚高 

Black Coffee
地址：旺角廣華街3號地下3號舖

文：Cathy
相：Calvin Kwok