無幾耐之後就係端午節，仲未買糭過節嘅，今年開飯仔搜羅咗一系列新口味及傳統口味嘅糭推介畀大家，包括今年勁流行嘅食材芫茜製成嘅芫茜鹹蛋黃糉、流心蟹粉糉、魔鬼麻辣糉、素食者都食得嘅素糉及大家食慣嘅傳統豪華鮑魚糭等，「糭」有一款啱你心水呀！

創新口味系列

EATLA「激茜」鹹蛋黃肉糉

呢間本地網上平台繼上次新年推出芫茜蘿蔔糕後，今次又乘勢推出全港首創嘅「激茜」鹹蛋黃肉糉！於傳統鹹蛋黃肉糉內加入大量新鮮芫茜，每一啖都係芫茜香氣，絕對滿足到芫茜控嘅訴求。另外更同本地品牌The Chilli Lab辣椒研究所合作推出香辣鹹蛋黃肉糉，手造蒜蓉辣椒醬係選用潮州家族三代配方，全人手製造，香辣惹味。

Golden Diamond Truffle 天使意大利松露瑤柱糭

以松露為主題嘅茶飲店，今年首度出天使意大利松露瑤柱糭及魔鬼麻辣XO糭。兩款糭均以廣東咸肉糭為基底，特別加咗意大利巴馬火腿，令味道更鹹香。前者加入原粒SA級北海道宗谷元貝，配以5克嘅松露片和松露醬，松露味幾突出。

上三兩 黃金流心蟹粉糉

蟹麵專門店推出嘅黃金流心蟹粉糉，一貫餐廳對黃金比例嘅堅持，蟹黃醬以公蟹粉丶母蟹粉及蟹肉調製，比例為5比3比2，搭配傳統鹹肉糉必備嘅鹹蛋黃，兩者味道好夾！

REIGN 北海道馬糞海膽糭

傳統蛋黃鹹肉糭中加入鮮甜海膽，選用產於北海道禮文島或根室嘅馬糞海膽，特別飽滿味道濃郁鲜甜，aftertaste仲好重。配埋同樣來自北海道嘅原粒宗谷元貝及意大利巴馬火腿，鹹香同時散發出陣陣鮮甜。

鏞鏞·藝嚐館 至尊燒鵝裹蒸糭

加入燒鵝嘅糭食過未？呢間餐廳係鏞記酒家嘅年輕副線品牌，選用鏞記馳名炭燒燒鵝，配以鮮甜原粒日本瑤柱、厚肉花菇、鹹蛋黃同腩肉，餡料十足。

土生花 韓式養生素糉

素食者而家都愈來愈多選擇，而家連韓式素糉都有得食～韓式泡菜養生素糉以自家製嘅走五辛泡菜混合糯米及紫蘇葉籽油，最後以蓮葉包裹，清新之餘帶有獨特蓮香。另外有埋韓式麻香養生素糉、韓式藥果養生甜素糉兩個口味添！

傳統豪華系列

大公館 38頭吉品鮑魚瑤柱裹蒸糉

經典嘅38頭吉品鮑魚瑤柱裹蒸糉一直好評如潮，以優質糯米搭配矜貴嘅吉品鮑魚及黑豚肉，夠晒豪華！

明閣 原隻鮑魚裹蒸糉

呢款一樣咁豪，內藏原隻12頭南非鮑魚、日本瑤柱、天白花菇、燒鴨肉、鹹蛋黃及金華火腿等，充滿層次感。

富豪酒店 至尊原隻鮑魚瑤柱火腿糭

呢間酒店一共推出五款應節糉，至尊原隻鮑魚瑤柱火腿糭選用多款珍貴材料製作而成，當中包括原隻10頭鮑魚、頂級瑤柱、金華火腿、精選鹹蛋黃及一級糯米等，內餡甘香濃郁。另外仲有瑤柱裹蒸糭、至尊花膠螺頭金腿瑤柱糭至尊桂花紅豆芋蓉糭及至尊蓮蓉鹼水糭，好有風味。

文: Yanica