兔年將至，又到一年一度初一至初十都要食賀年糕點嘅日子喇～怕悶嘅話可以搵多幾款新嘢試下，好似以下呢啲創新嘅口味都唔錯，亦祝大家食完糕點後新一年步步「糕」昇！

目錄

日暮香川  AK@Mirror - 櫻花蝦瑤柱蘿蔔糕禮盒

生粉注意喇！江老闆有份嘅呢個品牌今年首推賀年禮盒，上面更畫上 AK 一家之愛貓「芝麻」及「咪咪」嘅日式插畫，超可愛～所有糕點百分百香港製造，推介櫻花蝦瑤柱蘿蔔糕禮盒，以黃金比例 7 斤蘿蔔3斤粉製作，口感特別軟糯。仲有日本直送櫻花蝦、日本瑤柱絲及日本大根，鮮味十足。

寬巷子 姆明慈善年糕 - 櫻花蝦巴馬火腿蘿蔔糕

首度聯乘姆明一族推出慈善賀年糕點，櫻花蝦巴馬火腿蘿蔔糕混入西式食材，將傳統嘅中式金華火腿升級為優質西班牙巴馬火腿，多咗一份鹹香，送畀鍾意姆明嘅朋友啱晒！

龍景軒 蓮藕雪棗馬蹄糕

送畀長輩嘅，當然要貴重啲。四季酒店粵菜廳新推嘅蓮藕雪棗馬蹄糕就啱數～採用公認品質最好嘅泮塘馬蹄粉，烹調時廚師亦會密切監測溫度，以確保馬蹄糕的質地達到彈牙效果。雪棗不經浸泡，以保留最佳風味，伴以馬蹄同蓮藕，入口清甜輕巧。

香港富麗敦海洋公園酒店 「紅」運當頭年糕（紅菜頭年糕）

呢間酒店今年就推出呢個「紅」運當頭年糕，即係紅菜頭年糕，以紅菜頭粒、新鮮紅菜頭汁同埋馬蹄粉製作而成。比起一般年糕多咗份紅菜頭香氣，清甜爽滑，層次又幾豐富。

國金軒 金箔山楂柑桔糕

特製新口味金箔山楂柑桔糕，山楂健脾解膩，配埋清香嘅柑桔蜜，味道酸酸甜甜好開胃，食多兩件都唔覺heavy，再配以日本金箔，夠晒矜貴，都係好啱送畀長輩呀。

帝港酒店集團 遠年陳皮黑糖紅豆糕

去年首創嘅陳皮南瓜籽雲豆糕備受素食一族喜愛，今年再次推出全新口味嘅素糕，以遠年陳皮配以黑糖及老薑等炮製而成，糕身軟糯，甜而不膩，配上粒粒粉糯紅豆增加口感。 

香宮 香宮金沙奶黃糕 

奶黃一樣都係好受歡迎嘅口味，呢間中菜廳今年推出全新賀年糕點金沙奶黃糕。糕點混合咗鹹蛋黃粒，陣陣奶黃香氣再配上淡淡椰香，煎香後外脆內軟，口感煙韌軟糯。

奇華餅家 低糖合桃南瓜糕

現代人注重健康，呢間餅店推出創新低糖合桃南瓜糕，由自家廠房將新鮮南瓜打磨成蓉，與100% 純海藻糖、木薯粉、糯米粉、椰漿等材料混和，再加入原粒優質美國合桃，味道清甜。

鴻福堂 本地有機蘿蔔糕

蘿蔔糕最重要真材實料，今年呢間涼茶及港式小食店推出至尊本地有機蘿蔔糕，精選大澳張財記香濃蝦乾及本地有機蘿蔔，啖啖真材實料而且好惹味。

文：Yanica