情人節仲有唔夠一個月就到喇！講到情人節又點少得鋸扒，一齊睇吓香港有咩高質扒房，到時帶另一半去氹吓佢開心啦～
新米芝蓮扒房 Carna by Dario Cecchini 
圖：由有「世界最勁屠夫」之稱嘅Dario Cecchini主理，開業僅半年就成功入選米芝蓮指南年度推介餐廳，佢嘅理念係「從頭到尾」地珍惜每個牛肉部位，並結合傳統同創新烹調手法，為顧客帶嚟前所未有嘅牛肉體驗。必食經典嘅佛羅倫斯T骨牛扒，用炭火直燒，牛油脂溶化滲入牛扒，香氣撲鼻，入口係滿滿嘅肉汁同牛香。另一款必試嘅就係牛肉他他，係由牛臀肉輕輕炙燒，底部有少少焦香，再加上簡單嘅調味，如橄欖油、蒜頭、檸檬汁等，完美突出牛肉嘅鮮味。
頂級阿根廷扒房 Buenos Aires Polo Club
圖：主打阿根廷牛扒嘅頂級餐廳，結合馬球會所氛圍同阿根廷風情，由裝潢到菜色都令人有置身於南美草原嘅錯覺。一入到餐廳會見到大量馬球裝飾同古董餐刀，設計風格既奢華又精緻，加埋暖色燈光好有氣氛，非常適合同伴侶嚟個浪漫晚餐。呢度嘅牛扒選用阿根廷天然牧場嘅優質牛肉，以獨特嘅阿根廷烤製方法處理，如Tenderloin El Camino肉質嫩滑，牛肉嘅香氣濃郁，完全唔需要額外醬汁都已經好好味！另外薯條都係必點，佢哋用鴨油炸薯條，仲加埋蒜香調味，好惹味呀～
壯麉景觀澳洲扒房 OMAROO Grill
餐廳最大賣點係來自澳洲嘅優質牛扒，全部用濕式熟成技術處理，入口鮮嫩多汁、層次豐富，每一啖都食到牛肉嘅天然香氣，賓客可以欣賞維多利亞港美景，同時享受一場視覺、味覺雙重饗宴。推介昆士蘭350日榖飼和牛斧頭扒，整塊兩公斤重，油花分布均勻，肉質柔嫩得嚟仲帶住濃郁嘅牛香；如果想試啲骨香味重嘅牛扒，可以揀一公斤帶骨肉眼牛扒，骨髓嘅香氣慢慢滲入牛肉，肉味更加深邃。另外仲有澳洲西部榖飼200日西冷扒、USDA Prime極佳等級肉眼以及威靈頓牛柳等選擇。
原木炭火烤製牛扒 The Steak House
想喺情人節打造浪漫又難忘嘅晚餐體驗，一定唔可以錯過呢間餐廳嘅四道菜情人節晚宴！頭盤波士頓雞尾酒龍蝦選用可持續海鮮，鮮甜彈牙好開胃；薯仔凍湯配法國黑松露用上Perigord黑松露，味道濃郁奢華。至於主菜部分，最特別係所有燒烤菜式都用原木炭火烤製，食客可以揀選美國USDA Super Prime頂級牛肉或者澳洲Mayura牧場嘅頂級和牛，呢兩款牛肉都鮮嫩多汁，每一啖都充滿牛肉香氣，配上獨特嘅炭烤風味，唔使醬汁已經夠味！
人氣平鐵牛扒餐廳 Flat Iron Steak
如果想經濟實惠啲，可以考慮吓呢間最近好有人氣嘅平鐵牛扒餐廳～首先唔可以錯過1.2公斤斧頭扒，外層焦香內裡鮮嫩，充滿濃郁牛脂香氣；T骨牛扒集西冷牛扒同牛柳於一身，既有牛柳嘅嫩滑，又有西冷嘅濃郁肉味，一塊牛扒就滿足兩種口感。而且配菜都好吸引，如油香四溢嘅牛油汁薯條、龍蝦芝士通心粉，仲有啖啖鮮味嘅珍寶蟹餅配搭清新牛油果醬。甜品就有心太軟朱古力蛋糕同吉士奶昔，完美！
文：Yanica
編：Cathy