唔少Fans可能由一開始收到消息就已經相當期待，呢個由國民MC劉在錫代言嘅韓國炸雞品牌，終於呢個星期五喺旺角開幕啦！到底呢間炸雞店有咩咁吸引？炸雞有咩味？有無香港限定「好西」？睇開飯仔介紹啦！

韓國人真係好鐘意炸雞，煲韓劇或者綜藝節目就會見到佢地食，因為佢地當炸雞加啤酒係小食，三五知己得閒甚至自己一個人宵夜都會食。呢間Nene Chicken就係憑佢地秘製炸雞成為唔少韓國人嘅心頭好，連韓國國民MC劉在錫都代言超過十年！

講多無謂，食落肚最實際。首先推介嘅係連個名都浪漫過人嘅初雪炸雞，喺秘製原味炸雞上面加上芝士粉，就好似落雪咁浪漫，亦令大家諗起韓劇《來自星星的你》提過落初雪嗰日要食炸雞嘅情節。

芝士粉落得夠多，食到濃郁嘅芝士奶香同鹹香，同外脆內嫩嘅炸雞非常夾！唔講唔知，佢地嘅芝士同醬料等都由韓國直送嚟香港，保證大家食到好似喺韓國嘅咁好味。

唔想食太多芝士嘅話，原味炸雞亦相當唔錯。雞肉先醃兩至三日，再裹用上自家製麵粉嘅秘製炸漿，務求炸皮夠香脆，同時鎖住雞肉水分。食落脆皮唔算薄不過調味得宜，而裡面嘅雞肉亦唔會乾巴巴，如果可以再多少少肉汁就更Perfect啦。

鐘意重口味嘅可以點甜辣炸雞，入口先試到酸甜味，辣味後勁啱啱好幾刺激。想再辣啲嘅可以嗌火辣炸雞。相反想食Light少少嘅可以點綠豆芽炸雞，有用鐵架隔開喺底嘅汁醬，唔會令炸雞脆皮變腍又添加少少酸味。另外仲有大蔥口味。

部分炸雞口味細心地分埋有骨同無骨，用嘅油係韓國直送不含膽固醇嘅菜油，女士都可以放心食啦。

除咗炸雞，旺角店仲有香港限定Menu！呢個芝士潘朵拉炸雞一睇就知夠邪惡：焗脆咗嘅農夫麵包裝住水牛芝士，周圍仲有加咗芝士醬嘅炸雞。炸雞拉完芝仲可以切開麵包繼續點芝士食。

知道香港人想食炸雞當正餐，另外仲有其他韓國分店都無嘅小食，例如芝士炒年糕配韓式豬血腸和紫菜粉絲卷、忌廉芝士炸雞伴泡菜炒飯，同勁量級雞蛋卷。特別係個雞蛋卷有成45cm長，中間仲有芝士，邪惡到一個點。

有得食仲要有嘢飲，最特別嘅係有大大條鯊魚嘅Shark Attack，想少女啲嘅亦有用咗最近韓國大熱水蜜桃氣泡燒酒嘅特飲。最後，如果要盡興嘅話，仲有個成2L嘅Hite Beer Tower！

雖然代言人在錫Oppa無嚟到香港，不過門口亦有紙牌畀大家集郵。8月12號就正式營業啦，你會唔會嚟食件韓式炸雞？