今時今日想搵好嘢食，已經唔係淨係得油尖旺及銅鑼灣等地區㗎喇。近年其實愈來愈多地區彈起，好似港島區西環一帶咁，環境較市區寧靜交通又方便，吸引唔少餐廳同小店進駐！今次開飯仔介紹西環區幾間特色餐廳畀大家，包括西日fusion菜、台式咖啡店、日系cafe同創意美式熱狗店等，就算住得遠，都可以搵個假日入嚟行下同搵好嘢食。

法日fusion菜 Sup1   

成日食西餐食到悶，可以試下唔同嘅fusion餐廳。好似呢間法日fusion菜喺西環都幾好口碑，用料新鮮高質素，招牌菜式有香辣蝦配西班牙麵包，蝦肉新鮮彈牙，香辣惹味，用麵包點埋醬汁食真係一流～法式牛肉他他配多士都好受歡迎，牛肉肉質嫩滑而且牛味都幾突出。午市套餐選擇多元化，西式同日式都各有十幾款，燒春雞值得一試，外皮燒到脆卜卜又juicy；日式選擇嘅話推介香蔥海膽吞拿魚腩蓉飯，海膽加上吞拿魚腩蓉，鮮上加鮮！

圖: 餐廳Facebook

台式小清新cafe Eden

想念台灣嘅味道？呢間餐廳主打台式飲品同輕食，亦有唔少台灣早餐店常見嘅美食，如即叫即煎鐵板吐司，滿漢綜合口味餡料有雞蛋、芝士、煙肉同火腿，配埋充滿牛油香嘅丹麥吐司，簡單又好味，沙律醬加入蜜糖令層次更豐富。蛋餅呢就有芝士、燻雞、肉鬆等多款口味，仲可以揀雙拼，真係有種台灣早餐店嘅感覺～大熱嘅台式芋圓當然唔少得，叫返碗紅豆仙草芋圓，其中地瓜圓同紫薯圓煙韌得嚟仲帶有食材原味，幾出色。

圖: ahhbe

日系文青咖啡店 吾子廚房

以水泥色為主調，樓高兩層嘅咖啡店，空間感十足，最啱叫杯咖啡同輕食坐返個下午。必食招牌月見浮雲親子丼，啱晒相機食先，底層係鰹魚汁炒飯，好惹味，撈埋蛋黃食一流。無水西班牙蕃茄凍湯沾意粉配流心蛋香煎大蝦溫室野菜都好有特色，湯底用咗七款蔬菜打成，清新得嚟又健康，女仔食就最啱～去cafe又點少得甜品，4.3牛乳富士山奶酪吸睛之餘仲有濃濃牛奶味，爽爽檸檬香緹奶油蛋糕都幾推介，蛋糕鬆軟，忌廉帶有清新嘅檸檬香味又唔太酸。

圖: Sukiyu0318

誠意美式熱狗小店 Cheeky Dog Hot Dog

位於西環卑路乍街大街隱蔽小巷內嘅美式熱狗店，選材方面特意選用天然腸衣製成嘅腸，肉味會濃啲，Hot Dog Bun鬆軟得嚟有彈性。口味方面都幾多選擇，亞洲同西式口味都有，好似四川麻婆豆腐，愛爾蘭三十日熟成牛肉腸配上麻婆豆腐汁，醬汁加入花椒同豆瓣醬炒香後加入番茄同煮，番茄嘅酸味同辣味好和諧，估唔到同熱狗又幾夾。BIG BIRD就將雞肉腸炸香後，加入特製醬汁、蘋果粒、大蒜、大、煙肉 、肉桂同蜜糖等食材，炸過嘅雞肉腸口感更豐富，但又唔會太膩，幾有驚喜。

文: Yanica
編：Kar