獻給高貴優雅的媽媽
好Pure好Elegant 美心西餅
（左）#Elegant雙層雜莓蛋糕（右）#VeryPure士多啤梨意大利忌廉蛋糕
送蛋糕都要投其所好，如果母親大人平時一舉一動都非常優雅，咁呢個Elegant蛋糕就啱啦，雙層造型有迷你婚禮蛋糕Feel，上面鋪滿士多啤梨同藍莓之餘仲特別加咗真·金箔！雙層蛋糕嘅上層係鬆軟忌廉蛋糕，下層係幼滑嘅牛奶慕絲蛋糕。
如果母親大人鐘意浪漫優雅Feel嘅，就可以考慮呢個VeryPure蛋糕，由上面嘅忌廉到下面嘅蛋糕都係唔同層次嘅粉紅色，浪漫迷人。切開裡面係意大利Mascapone忌廉、士多啤梨醬、新鮮士多啤梨同士多啤梨啫喱。
High-Tea精品千層蛋糕 Lady M
（左）士多啤梨千層蛋糕（右）吉士海綿蛋糕
媽媽鐘意得閒自己嚟個High-Tea休息下，咁識享受人生嘅話就可以諗諗呢間蛋糕店嘅千層蛋糕。新登場嘅士多啤梨千層蛋糕特別選用時令嘅日本或者美國士多啤梨，招牌透薄班戟皮夾住士多啤梨顆粒同忌廉，帶自然清甜。
另外一樣係第一次喺香港面世嘅吉士海綿蛋糕就係將軟綿輕巧嘅雲尼拿海綿蛋糕切成正方粒再砌成半球體，顏色低調但造型相當吸睛。切開裡面係兩層杏仁味吉士，柔滑滋味。
獻給鐘意收花的媽媽
精緻康乃馨蛋糕 Harlan’s Cake Shop
（左）The Carnation溫馨花語（右）Piña colada椰子慕絲配菠蘿芒果啫喱蛋糕
女人無論係18歲定80歲都鐘意收花（好似係），母親節不如就送一個食得嘅康乃馨蛋糕！呢間餅店嘅溫馨花語蛋糕用咗玫瑰同紅莓忌廉做出康乃馨花瓣，無論望落定食落都有花嘅感覺。粉紅色慕斯裡面係朱古力海綿蛋糕、荔枝啫喱同紅莓粒，唔會太甜膩。
另外亦有三款全新蛋糕，當中椰子慕絲配菠蘿芒果啫喱蛋糕就將帶南美風情嘅piña colada特飲變成蛋糕：以椰子慕絲配以有真·菠蘿粒嘅菠蘿芒果啫喱，有夏日Feel。
粉嫩花瓣蛋糕 DALLOYAU La Boutique
（左）Flower Mother（右）Maman Fleurs
大大朵花送畀媽咪，靚得嚟仲可以畀佢影相示威！咁呢個Flower Mother蛋糕就啱哂啦，五個粉紅色花瓣形蛋糕加上新鮮紅莓砌成一朵大花，靚到唔捨得分嚟食。外層係幼滑士多啤梨同紅莓忌廉，配上鬆軟餅乾底。
鐘情細緻嘅亦有加咗真花嘅修女泡芙（Religieuse），夾住車厘子慕絲嘅金黃色泡芙上面用人手逐一點上一朵朵嬌嫩艷麗嘅可食用花，精緻到好似件藝術品咁。
獻給喜歡清新的媽媽
荔枝玫瑰心心蛋糕 Paul Lafayet
（左）Le Cœur Bienveillant(Heart of Caring)（右）Le Gratifiant(Gratitude)
呢個世界有無甜不歡嘅甜魔，自然亦有比較鐘意輕怡口味嘅媽媽，呢個時候揀返以水果為主嘅清新蛋糕會比較適合。例如呢間甜品店嘅Le Cœur Bienveillant就清甜荔枝海綿蛋糕搭玫瑰忌廉，花香怡人。而且粉紅色心形造型見到都變心心眼！
另外Le Gratifiant就係紅色絲絨蛋糕包住士多啤梨慕絲同雜莓果醬，最頂仲有新鮮雜莓，酸甜清新得嚟不失Sweet感覺。
士多啤梨藍莓兩款甜蜜 東海堂
（左）綺麗な冠(草莓絲絨蛋糕)（右）紫譽之心(藍莓絲絨蛋糕)
鐘意鮮果嘅清新又鐘意輕盈綿密口感嘅話，就可以選擇呢兩款絲絨蛋糕。紅色嘅綺麗な冠非常亮眼，頂層有新鮮原粒士多啤梨，下面紅色蛋糕蓉包住紅絲絨蛋糕、粉紅蛋白蛋糕、士多啤梨粒同士多啤梨醬，甜蜜細緻。
而紫譽之心就用咗清新嘅藍莓，裡面係香濃朱古力蛋糕加藍莓忌廉，外面一樣係綿密嘅蛋糕蓉，不過今次換咗雅致嘅紫色。頂部加咗銀箔原粒藍莓亦係亮點。
隨時接收最新資訊
讚好OpenRice專頁！
