秋時分天氣乾燥，最啱食啲清潤或較多蔬菜嘅料理，例如中菜就有粥品、養生燉湯、魚湯米線等選擇。今次介紹呢3間參加咗少鹽少糖食店計劃嘅中菜餐廳，分別推出上述菜式嘅少鹽少糖健康版，實有一款啱你口味。
蟲草花滑雞粥
雖然呢間係創意點心專門店，但都有粥品同滋補燉湯畀大家揀㗎。蟲草花滑雞粥將新鮮三黃雞加入粥底一齊煮，令肉汁同雞油滲入粥底；又以瑤柱同埋清甜嘅蟲草花提鮮，最後拌入蛋液增加香氣，咁樣比以往用少1/4茶匙鹽，更能品嚐食材嘅原味。
雪梨海底椰燉瘦肉
清潤嘅雪梨海底椰燉瘦肉湯，將雪梨去皮，燉嘅時候更易出味；而赤肉嘅精華令湯帶濃郁嘅肉味。加埋海底椰、麥冬、南北杏、蓮子、黨參等材料，入口鮮味又富藥材香氣。而且麥冬本身亦帶甜味，即使糖嘅用量減少75%，仍然好夠味。
羊肚菌燉水鴨
想暖胃啲則可以揀羊肚菌燉水鴨湯。師傅加入薑片，去除水鴨同赤肉嘅腥味；加上燉煮3個鐘後，羊肚菌、茶樹菇同蟲草花嘅菇菌香氣，以及紅棗同杞子嘅甜味都散發出嚟，只需少少糖吊味就可以。
時菜珍菌湯米粉
鍾意麵食嘅朋友，時菜珍菌湯米粉嘅湯底主要用原條大地魚製作，先將魚燒香，再加魚骨、豬骨熬煮4個鐘逼出鮮味，鹽嘅用量減少75%就可以提鮮。而白灼嘅鮮冬菇、雞髀菇、金針菇同菜心可以吸收湯汁，再灑上蔥花增加香氣，即使糖嘅用量減少66%，食落仍然清爽香甜。
生菜鯪魚肉湯米線
如果想有肉又要較少油脂，生菜鯪魚肉湯米線係唔錯嘅選擇。新鮮嘅鯪魚肉只需加入少許胡椒粉調味，湯底則用大量魚骨配豬骨熬煮而成，加埋生菜同蔥花嘅清甜味，令成碗麵嘅鹹甜度適中，只需2克糖同埋減少75%嘅鹽用量吊一吊味就夠喇。
番茄炒蛋配白飯
食材新鮮係家常菜嘅賣點之一，而呢道番茄炒蛋選用較熟嘅新鮮番茄，再加入新鮮番茄汁，味道唔會太酸，可以減少糖嘅用量；加埋炒蛋嘅蛋香，鹽同糖嘅用量分別減少75%同66%，更能凸顯食材原味。
野菌西芹炒牛肉
鑊氣小菜一樣有少鹽少糖健康版！呢道野菌西芹炒牛肉，先將薑片同蒜頭爆香，再炒香蘑菇、西芹、紅蘿蔔，令牛肉沾上蔬菜嘅香氣，一齊食亦更加清甜爽口，只需用1/4茶匙鹽提味就得。
啫啫芥蘭
一般啫啫煲會用較多調味料，而芥蘭好多時會配臘味，不過啫啫芥蘭就剔走XO醬等醬料，並選用豬腩肉。雖然鹽嘅用量減少一半，但先爆香蒜頭，以蒜油炒腩肉碎同芥蘭，令菜式保持香噴噴又夠入味。
揚州炒飯
白飯本身自帶甜味，再用蛋液包裹飯粒，炒至乾身，然後加入新鮮蝦同豬肉片提升鮮味，並灑上蔥花快炒，散發蛋香同蔥香，再落1/4茶匙鹽吊味，就足夠令熱辣辣嘅揚州炒飯香氣撲鼻。
