繼續同大家準備定美食博覽嘅攻略先~ 講完有咩一蚊貨，今次就講下有咩必行必食嘅攤位啦，一早做足功課，唔使怕走寶。
尊貴美食區
藍尾龍蝦湯、鵝肝焦糖燉蛋
用傳統配方烹調，加熱就飲得，極之方便，仲要龍蝦味都真係幾香濃呀。每日頭10名顧客仲可以用50蚊就買到！
估唔到將鵝肝加入焦糖燉蛋度整，又幾match廚喎，蛋香中滲出陣陣鵝肝嘅油香，好吸引，但係要喺尊貴美食區先享受到。
攤檔：歐洲食品有限公司 （3E-C02）
牛奶芝士
芝士控變心心眼啦，睇住師傅將個芝士圈一圈圈咁攪下攪下就攪咗成朵花出嚟！不得了！空口食又得，配麵包、意粉各樣都一流。另外將煙薰原味牛奶芝士配埋青提一齊食，又幾醒神。青提嘅酸甜飲芝士味更加香濃。
攤檔：芝士BB（3B-D21）
鮮黑松露手工啤酒、鮮黑松露鹹蛋雞蛋仔
手工啤酒近年大行其道，款式口味愈嚟愈多，今次本地品牌「吹啤啤」仲加入埋新鮮嘅意大利黑松露添，每批生產大約得500支，而food expo今次就限量200支，仲有現場生啤試飲，各位啤迷想試要趁早啦~
同檔仲有鮮黑松露鹹蛋雞蛋仔，先喺蛋漿度已經混入黑松露醬，表面再刨鮮黑松露都未夠，最後仲要淋埋白松露蜂蜜，松露控認真要試。
攤檔：宏展 （3B-A20）
藍莓冰酒、夏威夷椰子味Vodka
酒鬼就要mark實呢檔喇，兩隻分別嚟自加拿大同夏威夷嘅酒，前者莓味濃郁，果香醇厚；後者係加入新鮮椰子一齊蒸餾，所以飲落充滿椰香。
攤檔：溢怡 （3B-B08）
法國Raclette熱溶芝士鍋貼、黑松露神級生煎包、黑松露鍋貼
呢間今次搵嚟米芝蓮推薦嘅祥興記上海生煎包合作，將法國Raclette熱溶芝士同意大利黑松露醬加到鍋貼同生煎包裡面，記得相機食完要趁熱食。
攤檔：義生洋行（3B-B10）
公眾館
台式手工鹹湯圓、紅燒牛肉麵
之前喺餐廳到冬至先有得食嘅手工鹹湯圓，今年去美食博覽都食到！用圓糯米磨成米漿後揉成軟糯湯圓皮，再包肉餡就成為正宗台灣古早味鹹湯圓啦。餐廳必食嘅紅燒牛肉麵會場一樣有售。
攤檔：廚家班程班長飲食集團股份有限公司（1B-B32）
九重海鮮杯
自問貪心咩都想試嘅話，呢間就有九重海鮮杯，有齊炸魚蛋、香菇燒、章魚燒、墨魚燒同魚蓉燒賣。而且仲有五款醬汁任揀，包括醋意香草汁、濃香咖喱汁、北歐龍蝦汁、麻辣花椒汁同牛肝野菌汁。
攤檔：陳記食品有限公司（1A-E28）
Shake Shake雪糕
Shake Shake薯條就聽得多，雪糕原來都可以Shake！有3.6牛奶雪糕+美祿粉，同朱古力雪糕+美祿粉兩款口味，將雪糕同美祿粉擺落杯一齊Shake就食得。味道驚喜唔大，不過有得Shake Shake下又幾得意。
攤位：可可貝妮雪糕有限公司（1C-D21）
Shake Shake蝦片、Shake脆肉鬆齋雞粒
又一Shake Shake食品，繼舊年大熱Shake Shake蝦片後，今年新加Shake Shake懷舊小食齋雞粒呀。味粉仲有芝士、咖喱味、辣味、泡菜味、BBQ味同芥末味六款任揀。
攤位：冠華食品菓子廠有限公司（1D-B28）
華輝蘋果批、彈彈（豬）麵
呢間肉丸老字號為咗推廣大埔墟美食，特別將米芝蓮推介華輝餐廳嘅名物蘋果批帶去會場！每日14:00限量發售100個呀。另外品牌主打嘅牛骨濃汁牛丸同豬骨濃汁貢丸一樣有，仲可以配蝦子麵𠻹。
攤位：大埔振興有限公司（1A-C05）
原隻海參釀黑松露、芝士魚子醬熱狗
想食得豪啲？呢度就有意大利黑松露醬！加埋原隻海參真係夠哂霸氣。另一款熱狗睇落好似無乜特別，但其實係用咗拉脫維亞嘅芝士魚子醬，香味十足。
攤檔：雲君品味有限公司（1A-C07）
咸蛋辣椒味手工麵
世人已經無法阻止咸蛋變任何食品！今次有香港六十年老字號製麵品牌推出咸蛋辣椒味嘅手工麵，微辣帶鹹蛋香，就咁食都好夠味。
攤檔：貿豐發展有限公司（3E-A06）
松竹梅白壁蔵清酒
平時鍾意飲返兩杯嘅朋友或者都飲過唔少清酒，咁有無試過有氣嘅清酒？呢度就有齊寶酒造株式会社<澪>嘅有氣清酒、有氣清酒(DRY)同今年新增嘅有氣濁酒。會場特價$100/3支，$350/箱(12支)呀！
攤檔：新大和（香港）有限公司（1B-C18）
Joie乳酪飲品
日本人氣乳酪飲品，除咗乳酸菌之外仲額外加入鈣同維他命D。香港7-8月有暑假限定迪士尼特別包裝！包括原味、藍莓味、士多啤梨味同期間限定嘅檸檬蜂蜜味。
攤檔：香港益力多乳品有限公司（1B-C27）
果醋mocktail
呷醋有益？講緊嘅係飲果醋呀，呢個攤檔仲請嚟專業調酒師，將果醋變成mocktail，加入排毒水、班蘭或蝶豆花等。另外，每日3點同7點仲會免費派發指定呷醋特飲添，每round名額50個！
攤檔：高格行 （1C-A10）
第29屆美食博覽
展覽日期：2018年8月16至20日
地址：香港灣仔港灣道1號香港會議展覽中心
開放時間及購票指南：官方網站
文、相：Kar、Cathy