又到聖誕節同年尾最多 Gathering 嘅日子啦～唔少酒店同餐廳都推出好啱打卡嘅聖誕下午茶，即刻約埋朋友去食啦！

目錄

「萬」妙佳節下午茶派對  Mirage Bar & Restaurant

想感受傳統英式風味，呢個下午茶同英國百年老店 Whittard of Chelsea 合作，可以飲到熱騰騰嘅 Whittard 茗茶同一系列甜品～包括白朱古力紅莓曲奇、薑餅朱古力熱布甸、聖誕茶牛油蛋糕及聖誕咖啡焦糖燉蛋，一啖甜品一啖茶真係好夾。另有肉桂英式鬆餅，及一系列精緻鹹點如魚子醬三文魚薄餅，味道鹹鹹香香好惹味，仲有牧羊人批、小牛肉吞拿魚醬三文治及風乾火腿與芝士拼盤，真係好英倫風呀～

供應時間：2023 年 11 月 27 日至 12 月 31 日下午 3 時至 5 時

「Cielo x GLYCEL熊式閃亮」下午茶  星幕

平時鍾意扮靚保養嘅朋友就啱晒～同美容品牌聯乘嘅奢華聖誕下午茶，有鹹、甜點各五款，所有甜品都化身成聖誕造型，好有誠意。甜品有薑味英式鬆餅配玫瑰莓果醬及濃縮鮮奶油，淡淡薑味配上牛油香，令人驚喜；白朱古力熊仔樹頭蛋糕夠晒可愛。鹹點則有意大利風乾火腿配無花果、磯煮鮑魚、煙三文魚三文魚子多士、火雞紅石榴撻及脆口炸蝦。

供應時間：2023 年 12 月 16 日至 23 日、12 月 26 日至 2024 年 1 月 1 日下午 3 時 30 分至 5 時 30 分

Les Néréides x DALLOYAU聖誕下午茶  DALLOYAU

法國殿堂級糕點品牌聯乘巴黎飾物品牌推出充滿法式風情嘅限定聖誕下午茶，精心挑選優質食材，巧妙地將飾物品牌最新嘅聖誕系列飾品融入各款糕點～包括冬季紅桑子士多啤梨慕絲蛋糕、軟心黑朱古力果仁脆餅、薄荷朱古力聖誕樹幹蛋糕及栗子歌劇院蛋糕，原創歌劇院蛋糕配上濃濃嘅栗子奶油，香濃得嚟又唔會膩。

供應時間：由即日起至 2023 年 12 月 31 日下午 3 時至 6 時

Salisterra x Cookie Department下午茶  Salisterra

呢間酒店餐廳同著名曲奇品牌 Cookie Department 合作推出下午茶，以經典美式早餐為靈感，每一款糕點都好有巧思。鹹點包括雞肉牛油果多士、煙三文魚忌廉芝士貝果以及車打芝士鬆餅配蛋沙律等；最吸睛係 Cookie Department 製作嘅果醬曲奇，包括士多啤梨、檸檬、迷迭香蛋白霜三款口味，鬆脆得嚟唔太甜，甜品仲有巴西莓果碗、迷你奶香煎餅同海鹽焦糖法式多士。

供應時間：由即日起至 2024 年 1 月 1 日下午 3 時至 5 時

「魔幻森林」下午茶  WOOBAR

注重儀式感嘅朋友一定要試吓呢個以黑色作主調嘅 「魔幻森林」下午茶，型格又摩登！鹹點有尊貴 W 魚子醬配上車厘茄朱古力蛋批，三者睇落互不相干但食落卻出奇地夾。甜點就有榛子特濃咖啡杯子蛋糕及栗子蒙布朗蛋糕等，前者咖啡味好香濃，後者栗子香突出唔太甜。蔓越莓肉桂鬆餅都好出色，淡淡肉桂香蔓越莓又能增添層次及口感。

供應時間：2023 年 11 月 23 日至 2024 年 2 月 29 日下午 3 時至 6 時

GREEN X GODIVA漫遊世界星空下午茶  GREEN

朱古力控留意！呢間餐廳就同比利時朱古力品牌 GODIVA 合作推出下午茶，唔單止甜品連鹹點都注入朱古力元素。如燒法國鵪鶉配白朱古力香草汁，以優質嘅白朱古力為香草汁基調、加入新鮮香草，香氣濃厚；香煎澳洲草飼牛柳扒配GODIVA黑朱古力松露菌汁，肉質鮮嫩、黑朱古力同黑松露互相揮映。甜品就有鮮製朱古力草莓、黑森林朱古力泡芙及紅桑子朱古力檸檬撻等，朱古力 Fans 唔好錯過。

供應時間：即日起至 2024 年 1 月 31 日下午 3 時至 6 時

文: Yanica