聖誕節梗係要約埋朋友去嘆個下午茶同影靚相，一齊睇吓今年有咩聖誕下午茶可以帶畀你驚喜。

芭蕾之約下午茶 FINDS  

環境充滿濃厚北歐森林氣息，以樹幹剪影同木製鹿頭設計，令人猶如置身大自然。今次下午茶以重視永續嘅Davines東方美人系列為靈感，採用芭蕾舞同絲滑泡泡為主題，並融入蘿蔻紅色調帶出優雅嘅感覺。甜點靈感源於經典芭蕾舞劇《胡桃夾子》，每款茶點都重現劇中角色同情節，如女爵黑朱古力蛋糕採用西班牙黑朱古力製作，濃郁口感完美詮釋朱古力仙子嘅熱情魅力。鹹點就推介泡沫北海道帶子，鮮甜嘅帶子配上細緻醬油泡沫，帶嚟全新嘅味覺體驗。下午茶更送上Davines東方美人系列護髮套裝（先到先得，送完即止），延續呢份魅力。

供應時間: 由即日起至2025年2月28日，星期一至日下午3時至5時30分。

願望之樹下午茶 大堂茶座  

賓客可選擇喺典雅大堂茶座享受傳統下午茶，或者登上充滿節日氣氛嘅「半島節日列車」，體驗一場精緻華麗嘅下午茶饗宴。甜品雲呢拿忌廉配薑汁奶凍及杏仁撻幾特別，雲呢拿忌廉帶有天然香草嘅淡雅香氣，柔滑嘅薑汁奶凍帶嚟微微辛辣嘅暖意，底層係香脆鬆化嘅杏仁撻皮，同上層柔軟質感形成完美對比，另有蜂蜜慕絲配香橙果醬及海綿蛋糕、朱古力忌廉配冧酒提子乾及朱古力蛋糕等。鹹點一樣精彩，包括法式脆包配橡果級伊比利亞火腿及甜椒蓉、鵝肝配柑橘果凍及法式牛油軟包多士等。

供應時間: 由即日起至2024年12月13日及12月27日至30日

特色節日下午茶 The Butterfly Room 

匠心打造嘅節日下午茶，令賓客喺優雅氛圍中感受濃厚嘅節日氣息～下午茶內容豐富，包括精選傳統手指三文治、新鮮出爐嘅經典英式鬆餅，以及多款充滿節日氣氛嘅甜點。其中栗子蒙布朗芭菲，濃郁栗香配上綿密口感，完美呈現冬日味道；焦糖反烤蘋果梨塔，酥脆塔皮襯托焦糖嘅甜香，蘋果同梨嘅天然果味令人回味。另有朱古力焦糖燉蛋、焦糖千層酥等精緻選擇，配埋精選茗茶，帶嚟完美下午茶體驗。

供應時間: 由即日起至2024年12月13日及12月27日至30日

小精靈冒險之旅下午茶 Vivienne Westwood Café  

小精靈冒險之旅英式下午茶帶你踏上一場充滿驚喜嘅「尋找聖誕樹」冒險之旅！三層架最頂層帶你遊歷歐洲聖誕市集，特色甜品包括手工聖誕馬卡龍同香橙朱古力意大利芝士蛋糕；喺第二層跟隨小精靈漫步田野，發現金黃香脆嘅鵝肝醬多士，味道細膩而濃郁；第三層就會遇見聖誕老公公準備嘅鹹點，包括煙火雞牛油果醬配脆薄片同大蝦佐香辣芒果醬，滋味滿分。穿越森林後，小精靈發現濃濃肉桂香嘅蘋果金寶酥；同時仲有濕潤柔軟嘅沖繩香檸瑪德蓮，清新檸檬香氣令人無法抗拒！最終小精靈喺聖誕老公公嘅指引下揾到英式鬆餅，伴隨住抹茶牛乳特飲，大家喺水晶球聖誕樹下許願，溫暖氣氛照亮整個聖誕呀！

供應時間: 由即日起至另行通知，星期一至五下午2時後供應，星期六、日上午11時後供應

Saicho冬日花園下午茶 Salon Lanson

呢個冬日花園下午茶喺法式優雅氛圍中，帶嚟冬季主題嘅精緻美食。鹹點方面，有馥郁香濃嘅鵪鶉鵝肝千層酥批，令人再三回味。甜點則充滿節日氣氛，聖誕樹幹蛋糕以朱古力海綿蛋糕製成，完美呈現聖誕意境；經典紅絲絨蛋糕配斑蘭忌廉完美融入斑蘭香氣，好有特色。每位賓客更可享用一杯Saicho氣泡茶，提供大吉嶺同焙茶兩款選擇，清新茶香同美食搭配非常相襯。

供應時間: 由即日起至2025年1月5日之星期六、日，以及2024年12月24日至26日下午3時至5時

文：Yanica
編：Cathy