荃灣路德圍一向都係掃街好去處，最近又多一間小食店加入戰場！今次呢間係一間新開嘅泰式小食店，開業短短時間已經口碑唔錯～主要賣鐵板小食、串燒及泰式飲品，所有食物都即叫即製。店主Roy本身都係從事飲食業，而且好鍾意泰國野，所以就開咗呢間泰式小店喇～

鐵板龍蝦海鮮炒麵（$98）

招牌鐵板龍蝦海鮮炒麵，選用泰國龍蝦，龍蝦彈牙而且燒得唔乾身，另外仲有蜆肉等海鮮，可以自由選配烏冬、泰國公仔麵及金邊粉，而醬汁可選蒜味、黑椒及最人氣嘅冬陰公醬！

串燒（$16/串）

即叫即燒，有豬肉、牛肉、雞肉及雞腎等選擇，沙嗲汁係自家調製而成，店主話好多客人食過都好鍾意，因為比起坊間特別濃味同惹味，沙嗲香氣突出。

泰式香蕉煎餅（$28）、榴槤煎餅（$38）

去泰國必食嘅街頭小食香蕉煎餅呢度都有！即叫即煎熱辣辣，可加朱古力醬或煉奶，外脆內軟而且味道香甜；另外仲有榴槤煎餅，選用D24榴槤，榴槤味好香濃！

鐵板魷魚（$30）

鐵板魷魚同樣可以選擇蒜味、黑椒及冬陰公，魷魚爽口彈牙，配埋椰菜及洋蔥等更有口感。

泰式奶茶（$22）、香蕉阿華田沙冰（$38）

泰式奶茶都係必飲之選，比起泰國無咁甜，味道啱返港人接受到嘅甜度；而香蕉阿華田沙冰有泰國風味，啱晒嚟緊夏天飲！

泰谷   

地址: 荃灣荃興徑31號安富大廈地下4A號舖

文: Yanica

相: Tom Li