常問道人生有幾多個十年，OpenRice啱啱就有兩個。踏入開飯二十年，優秀開飯熱店2019以「歷久嚐新」做主題，擁抱經典、傳統老味道之餘，亦緊貼潮流，飽嚐新世代嘅美食。即刻睇下邊啲必試熱店入咗圍啦。
今時今日飲杯咖啡唔單止係提神咁簡單，仲係一種品味同生活享受，無論你係追求高品質咖啡、寧靜舒適嘅環境、甚至係打卡為主嘅特色甜品，今年優秀開飯熱店大賞咖啡店十強當中都總有一間滿足到你！
京都紅到返香港 % Arabica
唔少去開日本玩嘅都知道去京都就要搵呢間咖啡店，但唔係個個都知其實品牌第一間店其實開喺愉景灣，2017年終於喺尖沙咀天星碼頭開分店，旋即成為咖啡迷熱點！集合世界各地特色咖啡豆自家烘焙，加上日系簡約裝修同維港海景，係紅得有道理嘅。
圖：MGani
旺角特色竹炭Latte Pause It
旺角Cafe何其多，呢間位於山東街地舖嘅Cafe旺中帶靜嘅地利，加埋搶眼嘅黑白裝修同落地大玻璃窗環境先贏。最多人打卡嘅竹炭鮮奶咖啡夠哂特別，有咖啡醇香同時又有少少竹炭粉嘅口感。另外仲有淺藍色嘅藍橙拿鐵同粉紅色嘅紅絲絨拿鐵同樣啱哂相機食先。
山林道文青酒吧Cafe 梔子
又一間旺中帶靜嘅Cafe，高樓底、白色主調裝修加上裝飾特別有文青感。食物亦走小清新風格，有健康輕食、Bagel、果昔等等，不過估佢唔到嘅係同時又會供應本地手工啤酒、清酒、Cocktail等，想飲咖啡定飲酒你話事。
圖：imalwayshungry，miszetofoodie
樓上Cafe扮草地野餐 草民
就係睇準大家有時去咖啡店係想放鬆一下嘅心態，呢間尖沙咀樓上Cafe特別佈置草地畀大家喺室內扮野餐，原木色屋仔亦係另一個打卡點。提供手沖咖啡、意粉、小食、甜品等。招牌爆脆草地滾球其實係朱古力球甜品，有得玩有得食。
台灣過江心形窩夫 Dazzling Cafe
由台灣開到香港嘅Cafe，銅鑼灣店走田園風格，落地大玻璃窗加上兔仔耳裝飾嘅櫈成為少女們自拍熱點。本來招牌甜品係蜜糖吐司，不過早前推出嘅綿綿珍珠奶茶鬆餅亦大受歡迎，心形窩夫上面有奶茶味雪糕、忌廉同珍珠，鍾意煙韌口感嘅可以再加麻糬夾心！
相機食先主題Cafe 白宮
以上介紹嘅咖啡店雖然各有打卡位，但荃灣呢間就打正旗號以「相機食先」為主題，特設影相區擺滿唔同得意道具，All day breakfast材料豐富，連熱飲都可以加唔同卡通人物Latte Art，畀大家餵飽相機同時餵飽自己個肚仔。
咖啡店十強仲包括佐敦優質精品咖啡店Studio Caffeine、供應自家烘焙咖啡同西餐嘅Urban Coffee Roaster、紐約千層蛋糕名店Lady M、以夢幻主題同自家窩夫取勝嘅咖啡灣，邊一間係你嘅Cup of coffee，值得你用手上嘅一票嘉許？投票更有機會獲得豐富獎品，即刻票投心水：https://www.openrice.com/info/awards2019/index.html
文: Cathy
