美食當前，相機食先。作為foodie，先影為敬再放上IG直情係反射動作！優秀開飯熱店2018以「美食大晒 盡情Show Quali」主題，無論你係食家定係大廚，有好嘢自然要晒一晒！即刻睇睇各區同各類型必試熱店如何大晒功架！
想緊貼香港最新飲食潮流，睇睇今年入選嘅十間新餐廳就搵到蛛絲馬跡！每年嘅新餐廳都係指標，好似今年有大熱沾麵、梳乎厘班戟同台式火鍋等，你又有冇幫襯過先？排名不分先後，即刻睇睇開飯熱店大賞2018最強生力軍！
烤魚之冠 鐵魚川式食堂
烤魚專門店曾經百花齊放，呢間烤魚店經汰弱留強仍然有得留低，可見實力非凡。結合放題及火鍋，麻辣烤魚外亦自創多款口味如青檸越式烤魚、阿來冬蔭烤魚等，配上海鮮、火鍋配料一齊食，有創意！
圖：天才與飯焦
可愛卡通café L'attitude
主題café熱潮雖已過，但係呢間café仍然相當人氣，因為食物保持水準又有心思。招牌菜明太子炸軟蟹忌廉意大利麵、海膽蟹肉牛油梨芒果他他、羽衣甘藍火腿薄餅等，雲朵造型嘅棉花糖甜品同雞尾酒夠晒呃like！
圖：最強過江龍 芝樂坊餐廳
唔使多講，來自美國嘅連鎖餐廳The Cheesecake Factory，由開業震撼全港市民，至今仍然要排隊入座，真係飲食界一時佳話！餐廳將一系列招牌菜搬到香港，份量十足，而且有超多選擇嘅芝士蛋糕，實至名歸。
丼飯新皇者 スーパー丼
日式海鮮丼飯由大大碗變得精緻化，始終魚生新鮮才是皇道！呢間丼店裝修帶簡約風，刺身丼實而不華，除了招牌特上北海道海鮮丼、北海道帆立貝北寄貝赤貝丼、吞拿魚三色丼等亦有一系列熟食丼如醬燒廣島蠔丼同日式醬燒鵝肝丼。
圖：小木屋西餐 Chalet
香港有海量西餐廳，要突圍而出並唔容易！呢間荃灣小店小木屋裝修好cozy，而且食材配搭有心思，不少肉類用上慢煮烹調，慢煮青咖喱燴原隻羊膝、慢煮西班牙豬仔髀等，最重要係抵食，吸引唔少食客專登去食。
圖：新興吉列牛 吉列牛忌廉烏冬專門店
來自韓國的吉列牛專門店，將日本呢種流行食法帶來香港！吉列牛炸香外層，中間保持半生狀態，由食客自行控制生熟程度，有得食有得玩，另一主打忌廉烏冬亦係首次於香港出現，更成功帶起熱潮。
圖：大熱台式火鍋 養心殿台式養生鍋
火鍋一向受港人歡迎，今年大熱嘅係台式火鍋。台式麻辣相對較溫和，而且湯底濃郁有養生功效，如藥材鍋、酸菜白肉鍋、薑母鴨鍋等，配上鴨血、凍豆腐、手工丸類及A菜等台式配料，真係似去咗台灣打邊爐！
圖：沾麵風雲 風雲丸
拉麵同樣都係港人熱愛嘅食品，不過今年多咗沾麵呢種食法，更加有唔少沾麵專門店進駐香港。好似呢間來自廣島嘅風雲丸，豚骨魚介湯味道濃郁，更用石鍋上保持熱度，加上和風裝修，似置身日本食麵！
圖：好玩新潮中菜 名館
中菜博大精深，新餐廳點可以冇粵菜份呢？呢間新派中菜館由裝修至食物都好young好潮，選擇豐富，有燉湯、燒味、點心、小菜等，做得精緻出色，其中一道甜品13么造型似足麻雀，玩味十足！
圖：日式班戟龍頭 FLIPPER'S
為日式班戟掀起熱潮，除咗一眾本地甜品店，來自日本、被譽為「奇蹟之班戟」嘅FLIPPER’S居功不少！到現時仍要至少排一個鐘先入座，充滿空氣感嘅梳乎厘班戟，質感鬆軟輕盈，有原味及抹茶紅豆、鮮果等口味。今年有多個品牌繼續抵港，一於睇睇熱潮可唔可以至下屆優秀開飯熱店！
圖：優秀開飯熱店大賞2018詳情：https://www.openrice.com/info/awards2018/index.html
文：Perrins