【開飯熱店大賞2017】得獎名單大揭秘

今年嘅優秀開飯熱店大賞2017已經圓滿結束，再次恭喜所有得獎者，無論結果係點，都希望各位繼續努力，為一眾香港人帶嚟更多美食！雖然賽果已經塵埃落定，但我哋發現當中有啲小秘聞，一於公開同大家開心share啦！

五大票王首度曝光

我哋嘅得獎名單排名不分先後，今次開飯仔決定將頭五名最高票數嘅資料絕密曝光！原來今年獲得最多票數嘅係澳洲牛奶公司，亦同時係咁多年來獲獎次數最多餐廳，實力同上菜速度同樣咁勁。之後順序係咖啡弄、公和荳品廠、肥姐小食店同瑪嘉烈蛋撻店，有齊過江龍同澳門代表，證明香港人嘅口味幾咁廣闊。

最老店VS最新餐廳

獲荃灣/葵青區最佳餐廳嘅肉餅哥小炒料理，於2016年3月開業，係得獎名單之中加入OpenRice年資最短嘅餐廳，更同時入圍新餐廳及荃灣/葵青區兩個組別，認真威威！而最老店，一定係1909年開業嘅公和荳品廠，過百年一直專注做荳品，食物真材實料，深受港人愛戴，抵你年年都有獎攞！

外國勢力入侵

其實每年都有唔少來自外地嘅著名餐廳來港插旗，鍾意試新嘢嘅香港人當然相當歡迎啦，所以今年嘅得獎餐廳都有唔少五湖四海嘅過江龍，好似日本嘅中村藤吉同霸嗎拉麵、台灣就有咖啡弄同Dazzling Café兩間café，韓國Goobne Chicken、新加坡嘅樂天皇朝同美國嘅Lady M都榜上有名！

最強三料冠軍

以下呢間餐廳就犀利喇，一口氣橫掃三個大獎！Goobne Chicken今年獲得尖沙咀區、旺角區及韓國菜組別三個獎成為大贏家！恭喜晒！

全場最搶鏡大獎

呢個獎係開飯仔私人醒嘅，火鍋店鮮入圍煮嘅代表連續兩年都以別出心裁嘅盛裝到場，甫士一流，咁有誠意抵畀你搶晒fo啦！希望下年又見到你嘅新造型！

下年嘅優秀開飯熱店好快又再嚟架喇，各位要食多啲、評多啲，為自己心愛嘅餐廳做足準備！

文：Perrins