夏天嘅雪櫃，一定有雪糕嘅蹤影，咁今年有咩新品或復刻版唔可以錯過？即睇呢個check list幫唔幫到你啦～
9月27日更新
Meadows｜糖水雪糕杯系列
銷售點：惠康超級市場
平時飯後甜品鍾意食糖水嘅你，可以試吓糖水雪糕杯系列喇～陳皮紅豆沙、薑汁撞奶同椰香厚奶都無添加人造色素，其中椰香厚奶同薑汁撞奶更加入忌廉製成，口感相對比較滑，而椰香厚奶有埋椰絲，香氣更突出𠻹。
9月4日更新
Melona｜香芋雪條
銷售點：9月11日起各大超級市場、便利店
韓國Melona系列雪條系列有新成員喇！今次擺脆水果口味，加入同樣受大眾歡迎嘅香芋配搭脫脂牛奶，香芋味道幾濃郁，同水果味相比冇咁雪條感覺，會「杰」身少少。
麥當勞｜紫薯味新地配雀巢®KITKAT®朱古力
銷售點：麥當勞甜品站
人氣紫薯味新地筒回歸喇，今次更聯乘KITKAT®推出新地杯，配以原條KITKAT再淋上朱古力醬，口感同味道更豐富。期間限定優惠只係$9/杯咋（扭紋同價），各位紫薯fans把握時間回味呀！
8月26日更新
鮮芋仙｜招牌仙草冰沙
銷售點：指定7-11
香港都食到呢款仙草冰沙啦～台灣直送嘅招牌甜品，拌上黑糖麻糬，將古早風味升級。可惜另一款招牌雙圓仙草冰沙暫時未有引入，唔知可唔可以期待吓呢～
8月20日更新
MUJI｜抹茶味、豆腐味、黑芝麻味、朱古力味、雲呢拿味雪糕杯
銷售點：MUJI指定分店 - 皇室堡、太古廣場、又一城、德福廣場、新都會廣場、新城市廣場、屯門市廣場
香港MUJI 8月4日起首次開賣嘅雪糕杯系列，每杯100ml，5款口味包括用日本茶粉製作嘅抹茶味、帶淡淡大豆香嘅豆腐味、香滑嘅黑芝麻味、甜中帶微微苦澀嘅朱古力味同經典雲呢拿味。杯身設計顏色有啲Pantone感覺，真係食雪糕都有文青feel～
山浪｜山浪盤鹽檸檬紅茶雪葩、山浪盤鹽奶茶意式雪糕杯
銷售點：7-11
將為人熟悉嘅「茶」變成雪葩同雪糕～無添加乳製品嘅盤鹽檸檬紅茶雪葩，選用錫蘭茶底同黃檸檬，加上悅和醬園天然生曬嘅盤鹽調味，清新酸甜又有少少鹽味豆香。又盤鹽奶茶意式雪糕杯，則加入山浪嘅錫蘭紅茶為基底，混合悅和醬園盤鹽後更有層次感。
悅和醬園×da dino｜甜醋姜意式雪糕杯、特級醬油意式雪糕杯
銷售點：7-11
呢兩款中西fusion雪糕，甜醋姜意式雪糕以用悦和甜醋醃製嘅甜醋姜，結合意式雪糕，集酸甜辛香味。另外特級醬油意式雪糕，以悅和嘅特級天然生曬醬油為基礎，製成濃厚醬香同奶香風味嘅Gelato。
雀巢® ｜奶茶甜筒
銷售點：7-11
期間限定奶茶甜筒以升級版紅茶粉配方製作，經典茶香變成降溫良品。
7月31日更新
Lavelee｜粟米雪條、水蜜桃雪條
銷售點：Circle K（8月1日起）
韓國品牌清爽口味雪條～今次蔬果作為靈感，粟米雪條標榜每枝蘊含最少15克熟成粟米，更含有軟糯煙韌嘅粟米粒。而水蜜桃雪條亦有達14%以上嘅新鮮水蜜桃果肉，真係食雪條都有啖啖「果汁」啊。
DREYER’S®｜D-COLLECTION™美國開心果扭紋脆筒 / 美國開心果脆皮雪糕批
銷售點：7-11、OK便利店、香港百佳超級市場、惠康超級市場及各大超市
今個夏天有唔少開心果新品，包括呢款美國開心果扭紋脆筒同脆皮雪糕批～前著係美國開心果雪糕配搭牛奶雪糕，頂層有香脆嘅開心果粒粒，呈現唔同層次嘅堅果風味；後者則以經典比利時朱古力脆皮，包裹開心果雪糕同開心果醬內餡，兩款各有特色。如果而家至8月31日會去牛大人台灣火鍋吃到飽食晚市火鍋，可以任食D-COLLECTION™系列雪糕批同扭紋脆筒，連開心果新口味都有㗎！
7月23日更新
Häagen-Dazs™｜濃厚香提雪糕杯 / 開心果雲呢拿雪糕杯
銷售點：7-11、日式超市7月31日起陸續上架
全新日本直送嘅雙色Gelato系列，係意式冰凍甜點迷你杯裝，2款新口味都內藏2種味道𠻹。濃厚香提味用咗黑、白葡萄混合牛乳，食落去好fresh；另一款開心果雲呢拿味，開心果味好突出，夾埋順滑雲呢拿一齊食，唔會蓋過果仁香好氣。
The Nutter Company｜黃豆粉花生味雪糕杯 / 咖啡果仁口味雪糕杯 / 香烤杏仁口味雪糕杯
銷售點：city’super、3hreeSixty、指定Market Place分店、指定7-11分店、Oliver’s The Delicatessen、指定一田超市（售⾄7⽉29⽇）、PandaMart（只供應咖啡果仁味和香烤杏仁味）
呢間以自家果仁醬打出名堂嘅本地小店，都有製造雪糕杯㗎，最近再度融入品牌嘅果仁醬，推出3款新口味杯裝雪糕。黃豆粉花生味選用自家製花生醬同日本直送嘅黃豆粉，花生味都幾濃郁；咖啡果仁口味則混合自家製天然榛子醬同杏仁醬，配埋提神咖啡夾得嚟唔苦。但開飯仔覺得香烤杏仁口味最有驚喜，堅果香氣一入口就散開，層次感豐富。
Hershey’s｜特濃朱古力流心甜筒 / 特濃朱古力杏仁雪糕批 / 三重朱古力脆粒
銷售點：各大便利店及超級市場（三重朱古力脆粒限各大超級市場及7-11）
品牌一直以味道濃厚嘅朱古力而聞名，今次3款全新朱古力雪糕甜品，特濃朱古力流心甜筒加入濃厚嘅流心朱古力醬同朱古力碎；而特濃朱古力杏仁雪糕批同三重朱古力脆粒，都加入獨特扭紋朱古力醬，令朱古力味更加濃郁。
NESCAFÉ｜NESCAFÉ® CAPPUCCINO 雪糕批
銷售點：各大便利店及超級市場
全新推出嘅NESCAFÉ® CAPPUCCINO雪糕批，以意大利泡沫咖啡三重比例為藍本，將品牌自家咖啡粉打造成咖啡雲呢拿味扭紋雪糕，再以軟身咖啡外皮包裹，呈獻入口即溶嘅口感，有別於傳統嘅朱古力脆皮同冰凍咖啡新體驗。
7月6日更新
維記｜特濃朱古力軟心雪糕杯 / 特濃乳酪雪米糍 / 金鑽菠蘿雪米糍（Circle K限定） / 翠玉青蘋果雪米糍（7-11限定）
銷售點：7-11、Circle K
朱古力控必試全新特濃朱古力軟心雪糕杯！味道濃厚，可可香氣幾明顯。而雪米糍系列就有清新嘅乳酪雪糕、香甜嘅金鑽菠蘿（Circle K限定）同翠玉青蘋果3款新口味。
KOKUAJI｜意大利開心果濃滑雪糕 / 香甜甘栗粒粒雪糕
銷售點：惠康超級市場
意大利開心果濃滑雪糕採用北海道牛乳、意大利頂級開心果製作，奶香同果仁香氣恰到好處，而開心果仁碎則增添口感。香甜甘栗粒粒雪糕就將甘栗肉碎混合北海牛乳雪糕，香甜有咬口啊。
雀巢®｜紫薯牛奶味甜筒
銷售點：各大便利店、超級市場
雀巢®將人氣特飲「紫薯牛奶」化身成全新甜筒，夢幻嘅粉紫色紫薯味雪糕，同牛奶雪糕交織，配埋面層標誌性嘅花生碎同朱古力，味道層次更加過癮。
6月17日更新
森永｜MOW 香印提子雪糕（Circle K限定） / MOW 士多啤梨雪糕（Circle K限定） / PARM 士多啤梨杏仁奶凍雪糕批 / Pino 薄荷朱古力雪糕
銷售點：7-11
日本森永有多款冰品登港「MOW香印提子雪糕」同「MOW士多啤梨雪糕」係新口味，採用北海道牛奶製作，口感幼滑柔軟，仲分別加入日本香印提子汁同新鮮士多啤梨汁，味道清甜。另外兩款創新冰品，「PARM士多啤梨杏仁奶凍雪糕批」融合日式甜品杏仁奶凍同雪糕質地，更採用專利技術令外層白朱古力同內層雪糕同時溶化，內裡仲有士多啤梨醬；「Pino 薄荷朱古力雪糕」則採用北海道牛奶為基底，係清爽嘅薄荷雪糕。
Vita500 × Seoju｜Seoju維他500雪條
銷售點：Circle K
韓國國民提神飲料Vita500同Seoju聯乘推出嘅能量雪條，由韓國直送到港嘅雪條～以清新蘋果汁同橙汁為基底，含有維他命C但絕無咖啡因，感覺健康啲又更加冰涼！
IKEA｜榴槤植物素新地配榴槤肉
銷售點：IKEA餐廳、瑞典美食廊及美食站
由即日起，IKEA嘅D24榴槤植物素新地配榴槤肉，兩個星期會轉一款榴槤，而家（6月17日）就會配帶絲絲奶油香同回甘味嘅D168紅肉。如果怕食太多果肉會上火，7月31日前可以揀D24榴槤植物素新地筒止吓癮。
5月30日更新
雀巢｜超級大腳板
銷售點：7-11
充滿兒時回憶嘅「超級大腳板」，今個夏天以重磅120毫升大大腳板分量回歸呀！一邊係印上獨有嘅「大腳板」圖案雪糕，另一面邊係朱古力脆皮配上粒粒花生碎，回憶返晒嚟之餘幾有咬口。
GODIVA｜日本直送杯裝冰凍甜點限量系列
銷售點：GODIVA專門店（機場及免稅店除外）、Circle-K指定分店
比利時皇室御用巧克力品牌GODIVA，將朱古力同果仁、水果融合，帶嚟全新日本直送2024杯裝冰凍甜點系列。5款限量口味之中，有4款都加入黑朱古力碎，當中以「比利時72%黑巧克力碎黑巧克力冰淇淋」最濃味；而「黑巧克力碎草莓冰淇淋」就最fresh；另外果仁fans必定要試「榛子雙重巧克力冰凍甜點」啊～
十字奶｜意式雪糕系列新登場
銷售點：7-11
3款十字牌經典特色牛奶變成意式雪糕喇～雪糕加入本地農場嘅娟姍牛乳4.5，奶香味濃；香蕉味特別加入朱古力碎碎；士多啤梨同芒果木瓜更加含有真果肉粒粒，食落更加fresh。
Häagen-Dazs™｜呍呢嗱藍莓馬卡龍雪糕系列
銷售點：7-11
聯乘Pierre Hermé推出嘅「馬卡龍雪糕系列」，今年以呍呢嗱藍莓味延續法式風情。脆皮雪糕批將呍呢嗱雪糕拌入藍莓同黑加侖子嘅軟心醬；再配上馬卡龍質感般嘅薄脆朱古力脆皮外層，外脆内軟又有果香。而迷你雪糕杯更混合馬卡龍脆餅，有少少杏仁香氣。
雀巢®KITKAT®｜PINK粉紅脆皮雪糕批
銷售點：超級市場及各大便利店（暫定供應至年尾）
由細到大對KITKAT嘅印象就係朱古力，但同雀巢聯乘推出雪糕批系列後大受歡迎，繼原味同白朱古力味後，今個年推出PINK粉紅脆皮雪糕批！呢款雪糕批外層係士多啤梨脆皮同粒粒士多啤梨乾，味道香甜。
文：Cathy
