需知道，一塊靚肉要配合適當嘅烹調技巧，先至可以將肉嘅精華發揮出來，燒到又燶又韌，再靚嘅肉都會浪費。所以千祈唔好當燒雞翼咁，放喺爐上面隨便燒熟就算。每個部位、唔同醃法都有相應嘅燒法，食嘅時候點咩醬汁、配料都有講究，今次請來燒肉達人Samuel教路，點食法為之最好味。

1, Medium Rare最好

好似鋸扒，牛肉來講，燒至三成熟medium rare為最理想，呢個狀態可以食到最鮮嫩嘅肉質，亦有適當嘅肉汁，juicy唔會太乾。當然人人喜好各有不同，生熟程度視乎個人口味啦，接受唔到的話，medium或medium well啦。

2, 攤一攤先食

一燒完塊肉梗係趁熱放入口啦！千祈唔好，太熱辣辣一來會燙嘴，連條脷都麻痺晒，結果咩味都食唔到！二來肉類燒完攤抖一陣，熱力會慢慢鎖緊肉汁，肉味更突出濃郁。西餐煎完牛扒，會稱之resting，都係同一道理。

3, 特別部位燒法

唔同肉類切法唔同，厚薄燒法當然唔同啦！薄燒的話，快速燒完一面，反完再燒就得。厚燒如豬肉五花腩要先分別燒兩面，之後再煎香豬皮，剪成一條條煎四面。更高難度的牛肋骨，原條放上爐燒一面燒約30秒，一反就要剪開，再燒另一面。

4, 包生菜點醬汁

當然，原汁原味係好嘅，但肉類食得多都會膩，所以韓國人會用生菜，包住燒熱嘅泡菜、蒜頭、辣椒等配菜，包住一齊食，冇咁熱氣亦冇咁滯。又會有洋葱醬汁、魚醬及大醬等不同調味。日式燒肉通常都會有鹽、燒肉醬汁及檸檬，同樣有降膩作用。

5, 分門別類

雖然冇規定食物先後次序，不過如果先燒肉類的話，就燒晒所有肉，先輪到燒海鮮，以免烤爐沾上肉汁又有海鮮味，亂晒大籠，影響食材味道。

識得燒，其實唔難；但燒得好食，係另一回事。所以想食到最好味嘅燒肉，最好都係請專人代勞啦！

文：Perrins

相：Calvin Kwok

場地提供：炑八韓烤