生日呢個大日子當然係越多人一齊慶祝越開心啦，新派韓國菜餐廳School Food就為咗慶祝登陸香港三週年，即日起特別推出期間限定嘅菜式同飲品，有芝士迷大愛嘅「芝」味美食，亦有香「脆」 誘人嘅小食，無論你係相機食先嘅Foodie定係食咗先講嘅吃貨都可以留意！

雖然最近有唔少新嘅美食跑出，但對於芝士迷嚟講，始終無嘢可以代替拉芝嘅魅力！呢款叢林芝泉炸雞就用鐵板奉上裝滿芝士醬嘅麵包，無論係點邪惡炸雞定惹味青椒，最緊要嘅都係要記得瘋狂拉芝。

想捉住夏天嘅尾巴，點返碟脆蝦滑浪板就最有陽光與海灘Feel喇，滑浪板其實係細班戟，加上加咗脆麵做炸漿嘅炸大蝦、大蔥、紫蘇葉同蛋黃醬，一齊滑到你口入面！想體驗韓風就要試韓式熱狗，炸漿一樣加上脆麵但主角換成司華力腸，點埋茄汁或者蜜糖芥末醬，有種去咗韓國試街頭小食嘅感覺。

一班Friends想方便開心Share嘅仲可以嗌埋三重開心Share 拼盤，唔單止有齊香脆雞翼、惹味豬肋骨同牛仔骨三款小食，連醬汁都有韓式甜辣醬、蜜糖芥末醬同蛋黃醬三款任點。而釀原隻魷魚嘅魷上將，同有香濃芝士汁嘅芝海蝦脆麵亦係推介。

食到有少少口渴，亦可以點杯奼紫雪棉冰，紫色靚得嚟，裡面係用紫薯、藍同椰汁打成嘅幼滑沙冰。唔夠喉仲可以Encore一杯特別有夏日氣息嘅校園賓治。

完滿嘅一餐又點少得甜品呢？韓夏慶典芭菲係為三週年特別設計嘅甜品，Size夠霸氣之餘仲層次相當豐富，呃Like一流。要自私食嘅亦有Sweet Sweet嘅蜂蜜脆雪窩夫，同有大熱綠茶嘅遊綠園。

三週年限定菜式同飲品供應到十一月下旬，要嚟參加呢個週年慶典就記得要Mark好日子喇。