作為香港地道嘅小食，雞蛋仔可以話係既傳統又新潮，此話何解？雞蛋仔五、六十年代就已經開始有，食到今時今日仲出咗好多升lvl變奏版，例如夾雪糕食呀，又或者有綠茶味紫薯味等等。嚟緊呢個禮拜六、日，喺銅鑼灣有個雞蛋仔藝術節，到時仲有好多期間限定嘅獨創口味試添！

呢個「雞蛋仔巿集」就梗係有好多雞蛋仔食啦，唔止做開雞蛋仔嘅專門店會嚟開檔，就連一啲餐廳都會參與，雞蛋仔迷有口福喇！有唔少口味嘅雞蛋仔都係期間限定，或者係全新創造㗎！臘腸雞蛋仔都有呀！

玫瑰雞蛋仔  辦館LOF10 Bar Dining

餐廳本身都好多中西合璧嘅fusion菜，今次嘅雞蛋仔都嚟咗一個cross over ，喺原味之上on top再加parma ham、煙肉碎、朱古力漿同蜜糖，仲有玫瑰花瓣呀！香香甜甜der，同場仲可以配埋紅豆綠茶latte邊食邊飲添。

綠茶雞蛋仔   Seasons by Olivier E.

呢間米芝蓮一星餐廳根據香港人嘅飛佛嚟設計咗兩款雞蛋仔，分別係綠茶雞蛋仔同朱古力雞蛋仔。唔淨止得隻色水㗎，前者食落都有香濃嘅綠茶味，仲會配埋雪糕、紅豆蓉同煙煙韌韌嘅麻糬小丸子！

棉花糖雞蛋仔 Twins Kitchen

佢哋設計嘅4種口味，應該都係全港首創，包括有營火棉花雞蛋仔、蜜糖雞蛋仔、煙肉芝士炒蛋雞蛋仔同埋炸雞雞蛋仔！聽落都覺得好新鮮，睇下你係甜食派定鹹食派啦~

布朗尼朱古力碎雞蛋仔  Oddies

出名多花款嘅Oddies，繼續會有布朗尼朱古力碎雞蛋仔，仲有多款雪糕配搭，例如血橙、黑芝麻等等。

臘腸雙重芝士雞蛋仔   媽咪雞蛋仔(灣仔店）

米芝蓮街頭小食推介嘅雞蛋仔專門店當然都有一檔啦，仲帶嚟新口味添！當中最令人好奇想試嘅一定係臘腸雙重芝士雞蛋仔，究竟呢幾種嘢食溝埋一齊會係咩味呢？另外仲有牛油果朱古力雞蛋仔等等。

章魚燒雞蛋仔  滿屋雞蛋仔

除咗雞蛋仔，章魚燒都係另一樣香港人好喜歡嘅掃街小食，而佢哋就將呢兩種小食夾埋一齊，用章魚燒漿整出嚟嘅雞蛋仔，面頭加埋木魚絲同章魚燒醬，有蛋香味之餘，仲粒粒裡面都食到粒章魚，幾過癮！

「雞蛋仔藝術節」活動詳情
日期：3月4、5日（六、日）
時間：11am – 7pm
地點：銅鑼灣利園一期私家路（希慎道33號）
特色雞蛋仔攤位：
餐廳：Seasons by Olivier E. 、Twins Kitchen孖人廚房、辦館LOF10 Bar Dining、東大門韓國料理
雞蛋仔專門店：媽咪雞蛋仔(灣仔店）、滿屋雞蛋仔、Eggspectation、Oddies

文、相：Kar
 


開飯編輯推介：

1. 【專訪】日本人在香港 開餐廳最重要健康行先

2. 1月份好評餐廳十強

3. 2017亞洲50最佳餐廳 地區最佳餐廳全攻略



熱門文章推介：

1. 【一個人開飯】一個人喺大埔食乜好？

2. 【熟食中心尋寶】禾稈冚珍珠 皇后街熟食市場

3. 【二人前指南】港九新界齊最啱拍拖特色Cafe

隨時接收最新資訊
讚好OpenRice專頁！