平時上網見到朋友飛日本去卡通主題餐廳，只可以各種妒忌羨慕恨，今次香港終於都有自己嘅主題Cafe啦！荃灣呢間Cafe一直都有唔同動漫主題，6至7月輪到香港唔少女士嘅集體回憶：百變小櫻Magic卡！到底有咩食？環境點？有無伏？嚟睇開飯仔報告啦！

貴精不貴多，食物總共得九款，飲品就有八款。餐牌其實同之前日本期間限定嘅小櫻Cafe一樣，雖然食物名就落返日文名，但好在下面寫哂食材而且全部都有相，唔明日文都唔洗驚。

實物同餐牌相亦非常相似，最吸睛嘅係呢個Egg Benedict，切開水波蛋超流心連埋煙肉同荷蘭醬一齊食無得輸。紫色嘅Egg Benedict嚟自加咗紅菜頭嘅荷蘭醬，放心紅菜頭味道唔太濃，同朋友一齊開心Share無難度。

如果無飯不歡嘅就可以揀呢個解除封印咖喱飯，飯粒分明而且咖喱汁惹味，伴碟嘅藍色米紙都食得㗎！另外以小狼做主題嘅冷麵入口彈牙，加埋配料同芝麻醬就好味又透心涼。

食物設計全部都好有心思，例如有小櫻去運動會嗰陣帶嘅飯糰便當，有睇開日劇或者動漫都會非常熟悉嘅八爪魚形香腸。而鬆餅同焦糖蛋糕Set就襯返知世優雅嘅形象，口味唔會太甜，加埋忌廉一齊食就啱哂。

最特別嘅要數呢杯古羅卡芭菲，忠實Fans一定記得古羅卡分水火風地四大屬性，而呢杯芭菲就有齊哂！最底嘅雜莓代表火、中間藍色沙冰代表水、古羅卡曲奇附近嘅石頭朱古力代表地、最後上面嘅棉花糖代表風。芭菲嘅雜莓雪糕球酸酸甜甜咁，稍嫌藍色沙冰甜咗少少。

飲品全部都係以人物做主題，少不免有少少整色整水嘅感覺，不過就啱哂相機食先啦。主角小櫻同小狼嘅特飲睇落好Sharp。另外基路仔杯芒果沙冰有對得意翼仔，其實係糖片嚟，甜魔覺得特飲唔夠甜可以自己加糖啦（誤）。

餐廳周圍都貼哂小櫻同其他角色嘅Poster，枱上面全部都有古羅卡仲要張張都有唔同。最特別嘅就要數個古羅卡箱，打埋燈比各位Fans瘋狂Selfie用。嚟潮聖嘅Fans們，記得預多啲時間啦。

info
Youme Cafe百變小櫻Magic卡主題Cafe
活動日期：即日起至2016年7月31日
*訂座限額已滿，Walk in籌號暫於每日中午12:00開始派發