食飯除咗係大飽口福，仲可以幫助弱勢社群，同時關注返自己身心靈？灣仔呢間由新生精神康復會開設嘅社企Cafe就可以幫大家，用一餐飯嘅時間放鬆下，品嘗注重均衡飲食同時令食材嘅食養定食，同時協助復元人士重新投入社會！
 

so330位於旺中帶靜嘅灣仔太原街，店名「so」可以解Social Enterprise（社會企業）同Social Mission（社會責任），皆因新生精神康復會目標就係推動社會共融及支持康復者自力更生，而so330當中嘅咖啡師、廚師等都有機會係精神病康復者。

「so」同時亦有「非常」嘅意思，餐廳環境、食物、服務等，都係非常呼應返「330」、即係「身心靈」呢個主題。希望成為城市裡面嘅綠洲，為灣仔嘅街坊同打工一族舒緩壓力，同時提醒大家身心靈健康嘅重要性。
 

有機茄子定食（$86，11:30-14:30供應）

既然以身心靈為主題，食得健康都好重要，呢份定食就請嚟食養生活嘅食養導師岸本太太以均衡飲食、不時不食、選用本地當季蔬菜等概念設計菜單。例如最近入秋，就以當造嘅有機茄子入饌，加上黑藻有機小松菜、青瓜漬物、十穀飯、是日餐湯、水果。套餐會附上卡片，建議客人先由味道較淡嘅蔬菜、水果食起，同提醒大家保持感恩同愉快嘅心情進食。
 

有機茄子以薑黃、孜然等天然香料炒香，香氣十足，有啲似咖喱但無咁辣，而且茄子有暖胃嘅功效。黑藻有機小松菜簡單以日本醬油同麻油提香，可以食到食材原味。十穀飯加入紫淮山、薏米、全榖麥等，膳食纖維、維他命B雜都比一般白米飯高，口感都更豐富。
 

dayday330全日早餐（$88）

全日早餐亦相當豐富，煙三文魚同炒雜菇夠香口，配上太陽蛋、沙律，同嚟自新生精神康復會石排灣綜合培訓中心嘅意式香草包（Focaccia）！意式香草包烤至外酥內軟，而且係純素配方呀。
 

即撞有機豆花（$98，14:30-17:30供應）

甜點都有心思，呢份豆花只用有機豆漿、粟粉同石膏粉即叫即撞，所以需要等約20分鐘，口感軟嫩入口即化，黃豆香自然討喜。可以隨意添加附上嘅冰糖水同黃糖，增加甜香。分量足夠2至4人分享，甜而不膩當下午茶都唔錯。
 

意式奶凍配特濃咖啡或有機抹茶（$58）

一個人原來都可以盡興，呢份甜品就最啱一人享用，意式奶凍口感綿滑又不失Q彈，咁咁食味道偏甜。所以配搭香醇嘅濃縮咖啡、或者茶香濃郁嘅有機抹茶漿就可以平衡返甜度，同時增加味道層次。
 

純素手工香蕉合桃蛋糕（$24）

餐廳有唔少低碳、有機同素食選擇，包括呢份自家製嘅香蕉合桃蛋糕。秘訣之一係用熟透嘅香蕉，唔需要加雲呢拿香油都夠香。食落外脆內濕潤，咬到一粒粒烘過嘅合桃更香口。
 

so330結合「健康咖啡店」、「身心靈空間」及「共融咖啡師學院」三大概念，共融咖啡師學院係專為弱勢社群而設，例如對弱視人士嚟講要上坊間一般嘅咖啡課程會比較吃力，因此共融咖啡師學院嘅咖啡師培訓就可以幫到佢哋就業。
 

手沖花香玫瑰咖啡（$48）

花香咖啡選用本地烘焙咖啡豆配搭法國粉紅玫瑰，聞起嚟花香馥郁，飲落亦完全唔苦，反而有啲似飲緊玫瑰花茶！如果有興趣嘅話仲可以點選手沖花香咖啡體驗（$48），根據指示自己做自己嘅咖啡師，手沖花香咖啡。而330手沖咖啡（$68）就會選用Coffee Review杯測92分嘅單品咖啡豆。
 

冷泡玫瑰咖啡（$48）

花香玫瑰咖啡亦有冷泡版，冷泡21小時後帶少少酒香，甘甜嘅味道亦更突出！冷泡咖啡以玻璃樽奉上，細心留意嘅話貼紙後面亦有印上字句，當咖啡飲完就會見到完整句子，細品咖啡香嘅時候亦提醒大家適時放鬆下。
 

焦糖薄脆泡沫咖啡（$48）

Espresso base咖啡預設係用糅合四個唔同產地咖啡豆嘅House Blend，風味偏黑朱古力。亦可以+$5升級為單品豆。想再特別啲可以揀呢杯焦糖薄脆泡沫咖啡，即係喺泡沫咖啡上面灑上砂糖再燒，敲開焦糖脆面同咖啡一齊飲，增添焦香同甜味，既係飲品亦可以當甜品！
 

新生精神康復會嘅社會企業助理業務經理Tony預告，之後將會推出融入靜觀概念嘅Tea Set，亦有機會舉辦咖啡拉花班

提供「一席 Solo Dining」座位，一個人都有舒適安寧嘅空間享受美食，Cafe同時亦會舉辦關於身心靈嘅講座同工作坊

so330
地址：灣仔太原街38號太源閣地下A-C號舖

文：Cathy.H
相、片：Wilfred Chui