【鼠年開飯】盆滿缽滿團年盆菜最平74折！

新春團年，特別係一大班親朋戚友食飯就最啱食盆菜！一嚟盆菜寓意盆滿缽滿、豐衣足食，二嚟整熱就食得夠晒快靚正。今年仲有唔少盆菜主打唔同嘅矜貴食材，揀啱心水再睇埋有無OpenRice優惠，就最好盡早預訂喇。

鮑魚鵝掌古法羊腩盤菜

呢間開咗超過半世紀嘅中菜館連續第九年得到米芝蓮二星，水準當然有保證。今年推出嘅兩款盆菜分別係鮑魚鵝掌烤鴨盆菜，同鮑魚鵝掌古法羊腩盤菜。兩款都有極上鮑魚、鮑汁扣鵝掌、竹笙等，前者配豆醬烤鴨同茄汁海蝦球，後者就有好啱冬天食嘅古法羊腩配鮮蔬拼盤。

素食傳統任你揀　丹尼盆菜到會

（左）極上素盆菜，（右）至尊鮑魚盆菜

近年越嚟越多人開始食素，呢間到會就非常貼心咁準備咗全素，無蛋奶成分嘅極上素盆菜！唔好以為素食就好寡，呢個素盆菜就有素鮑魚﹑牛肝菌﹑野生竹笙﹑秋葵﹑鮮淮山等。另外仲有傳統富貴盆菜，同再豪啲嘅至尊鮑魚盆菜。盤菜都係即日新鮮製作，包送貨服務同保溫包裝。

紅酒配鮑魚盆菜　鷹巢　

鮑魚花膠盆菜

食盆菜其中一個最開心嘅地方，就係可以試勻唔同矜貴食材！例如呢間酒店推出嘅鮑魚花膠盆菜就包括大連蠔皇鮑魚、滋補花膠、原隻大蝦、原粒瑤柱甫、鮑汁扣鵝掌等，由酒店總廚精心主理。用埋優惠券仲送一支南非紅酒，或一客酒店自家製無添加吉祥椰汁年糕呀。

和風海鮮VS法式盆菜　五餅二魚美食料理

（左）和風海鮮盆菜，（右）法式紅酒盆菜

講開盆菜通常大家都覺得係中式，有無諗過可以係糅合日式甚至係法式元素呢？呢間到會就供應傳統盆菜、和風海鮮盆菜，同法式紅酒盆菜！和風海鮮盆菜有刺身帶子、炸軟殼蟹、青口、照燒雞扒、油揚福袋等，法式紅酒盆菜就包括炸龍脷柳、英式腸、牛肋條、炆牛尾、煙鴨胸等，同樣豐富。

八頭鮑魚+燕窩福袋　香宮

團圓福至盤菜

同為米芝蓮星級中菜館，呢間餐廳今年推出由中菜行政總廚張師傅主理嘅團圓福至盤菜，採用多款矜貴食材：八頭鮑魚、龍蝦、蠔豉、原隻花膠筒、鵝掌、松茸燕窩福袋等等，再以精美瓷器盛載。新年要宴客嘅話一定夠得體！

精緻「福」字盆菜　滿福樓

賀年盆菜

而灣仔呢間酒店中菜館今年亦有推出寓意團圓嘅新春盆菜，選用意頭十足嘅上乘食材：原隻二十五頭花膠、原隻鮑魚、原粒瑤柱脯、海蔘、蠔豉、蝦球、髮菜、貴妃雞、鵝掌等，當中最搶鏡嘅就要數到精緻嘅「福」字蘿蔔！食之前記得「相機食先」呀。

鮑魚盆菜配窩巴脆脆　薈一會

豬圓玉潤金盆菜配窩巴脆脆

呢間到會嘅主廚蔡師傅曾擔任米芝蓮三星中菜廳副總廚，而且有超過二十年高級中菜製作經驗。今年就諗到推出盆菜配窩巴！豬圓玉潤金盆菜本身已經有原隻鮑魚、原粒瑤柱、金蠔等多款上乘食材，醬汁仲係用鮑魚、金華火腿、老雞等熬製，所以用香脆嘅窩夫點醬汁一齊食就最啱喇。

新春喜慶盆菜　逸東軒

鮑魚發財盆菜

佐敦呢間米芝蓮一星中菜館之前換上全新裝修，不變嘅係一樣主打各式傳統粵菜。今年佢哋推出兩款新春喜慶盆菜：鴻運發財盆菜有頂級蠔豉、花膠、瑤柱甫、蝦、豬仔腳、燒鵝、貴妃雞等，同再加上原隻十頭鮑魚嘅鮑魚發財盆菜，豐儉由人。

人氣足料網店盆菜　五味真火

（左）至尊版盆菜，（右）豪華版盆菜

呢間網店主打老火靚湯同燉湯，嚟到農曆新年就推出三款唔同盆菜，至尊版有成12隻鮑魚！再加花膠、燒鵝、貴妃雞、貝柱、客家腩仔、鮑汁鵝掌、美極大蝦等，同佢哋嘅燉湯一樣足料呀。想食平啲啲可以揀豪華版，少咗鮑魚同花膠但一樣好味。

迷你鮑魚盆菜　飲茶　

福滿小盆聚

通常啲盆菜都係6人分量，兩三個人一齊就可以去呢間新派點心店試迷你盆菜！呢個福滿小盆聚睇落細細份咁，其實有齊花膠、鮑魚、海參、乳鴿、鮮冬菇、炆腩仔、蓮藕、蘿蔔、枝竹同西蘭花，十樣食材唔會過多而且仲代表十全十美吖嘛。

文：Cathy