龍年就快到，又到咗一年一度不停食糕點嘅日子啦～既然係咁，不妨早啲買嚟食，有優惠之餘重可以早啲享受，用嚟送禮又得！

巴馬火腿蘿蔔糕、沖繩黑糖薑汁年糕、乾清棗皇糕 采悅軒

三款招牌包括香氣四溢嘅巴馬火腿蘿蔔糕，加入巴馬火腿比一般嘅蘿蔔糕多咗一份鹹香，層次更豐富。香甜嘅沖繩黑糖薑汁年糕味道清甜，黑糖味好香，口感煙韌嘅乾清棗皇糕啱晒長輩食，送禮自用同樣得宜。

由即日起至2024年1月20日於網店訂購可享85折早鳥優惠。

陳皮桃膠吉士玫瑰糕、盆滿缽滿芋頭糕 帝港酒店集團

推介盆滿缽滿芋頭糕，以香軟粉糯嘅芋頭切粒後配上油腴甘香嘅臘味粒精製而成，甘香惹味。今年更推出全新嘅陳皮桃膠吉士玫瑰糕同五色雲豆發財菌皇糕，前者將桃膠配以遠年陳皮、玫瑰醬同吉士，糕身軟糯，甜而不膩，口應豐富，而且兩款都係素食嚟～重有唔同糕點配搭嘅禮盒。

由即日起至2024年2月2日或之前預訂，可享85折起早鳥優惠。 

新春年糕禮盒 逸東軒

米芝蓮一星食府，招牌瑤柱臘味蘿蔔糕嚴選頂級瑤柱、甘香惹味嘅臘腸、臘肉、蝦米同冬菇等製成，夾雜清甜蘿蔔絲，香氣四溢。富貴椰汁年糕則以清甜蔗糖同新鮮椰汁炮製，入口散發陣陣撲鼻嘅椰子清香，口感軟糯煙韌，清香宜人，新春年糕禮盒一盒就包晒呢兩隻味啦！

於2024年1月31日前訂購即享低至75折早鳥優惠。

傳統椰汁年糕、粵式蘿蔔糕 黃金海岸酒店×粵

最受歡迎嘅傳統椰汁年糕～呢款年糕以椰汁為主要材料，超濃郁嘅椰香味，口感煙韌細滑，清甜而不膩。另外重有粵式蘿蔔糕，每一口都食到清香嘅蘿蔔絲，搭配大量蝦米同臘味，真材實料！另有兩款華麗得體嘅禮品裝，分別係錦鯉魚造型嘅「年年有餘椰汁年糕賀年禮盒」同「粵品蘿蔔糕配 X.O. 醬禮盒套裝」～

現凡購買賀年糕點同新春美食，即可享85折，滿4盒或4套以上更可享75折。

桂花馬蹄糕、鮑魚瑤柱臘味蘿蔔糕 明閣

呢間酒店嘅人氣中菜廳同分店，各推出唔同嘅賀年糕點！灣仔店就有瑤柱臘味蘿蔔糕、沖繩黑糖椰汁年糕同桂花馬蹄糕，口感爽脆嘅馬蹄片配上乾桂花，味道清甜有口感。旺角店則有鮑魚瑤柱臘味蘿蔔糕，選用粉嶺本地農場種植嘅蘿蔔、玫瑰臘腸、鮮製臘肉、瑤柱同鮑魚，真材實料；重有富貴椰汁年糕同棗皇椰汁糕呀。

即日起至2024年1月22日可享低至75折早鳥優惠。

招牌棗皇糕 利苑

棗皇糕精選極品紅棗皇，棗味醇厚，滋潤養顏，配以濃郁椰子汁，煙韌留香。如意蘿蔔糕就精選靚蝦米同優質生曬鮮肉臘腸，融入新鮮蘿蔔，質地柔軟，口感香濃惹味。而臘味芋頭糕選用生曬優質鮮肉臘腸同荔浦芋頭，質地鬆軟，口感嫩滑，香味馥郁。

由即日起至2024年1月21日於網店訂購可享95折早鳥優惠。

文：Yanica
編：Cathy