話咁快又就嚟中秋(9月14號) ，各位月餅控等足一年又等到喇！不過年年都係傳統月餅、奶皇月，甚至冰皮咁都可能開始食到悶悶地……所以每年有多款新潮口味月餅湧現，啱晒各位鍾意試新嘢嘅勇士！
KFC 香辣雞絲果仁月餅
講到今年最有話題性嘅新月餅，KFC一定佔一席位。話晒阿上校第一年出月餅喎……事前好多人都估會唔會係炸雞味？中咗少少啦，係香辣雞絲果仁月餅同黃金流心奶皇月餅。前者食落有少少似五仁月，都係好多粒粒果仁、杏仁、葵花籽等，再有絲絲微辣嘅雞肉鬆；至於後者，感覺就偏甜咗啲。
太興 滿燻燒鵝果仁叉燒月餅
另一個話題月餅，應該就係太興嘅滿燻燒鵝果仁叉燒月餅喇。餅皮裡面包住嘅，係以5種獨門香燻料秘製而成嘅滿燻燒鵝，加佢哋嘅招牌叉燒，好有港式風味。仲搭埋合桃、腰果等果仁，增加鹹香同口感，至於夾唔夾就見仁見智啦~ 科科。
星月居 12黃大團圓月餅
呢間中菜館今年推出全港最大嘅「大團圓月餅」，有成12隻鹹蛋黃咁多，唔使爭，點切都一定人人有份！而且佢哋使用湖南嘅紅蓮蓉，相對上仲冇咁甜膩添，啱晒一家大細一齊食﹗純人手製造㗎，限賣800個咋﹗
尚鮑 鮑魚、燕窩奶黃月餅
想食月餅都豪華過人？咁呢個月餅一定係你嘅首選啦﹗今年尚鮑首創鮑魚奶黃、燕窩軟心奶黃月餅，前者以低溫慢煮嘅南非鮑魚切粒，混入奶黃中間，粒粒鮮彈。另外仲新出咗茅台朱古力軟心月餅，貴州茅台結合比利時黑朱古力，冇咗傳統月餅嘅甜膩感，食落仲有淡淡嘅酒香添﹗
KiKi 櫻花蝦芋泥麻糬蛋黃月餅
台灣麵店今次唔再賣麵，要應佳節賣月餅啦﹗佢哋推出嘅櫻花蝦芋泥麻糬蛋黃，聽個名都知材料唔少啦。櫻花蝦乾同鹹蛋黃，再加埋甜甜地嘅香芋同麻糬，充滿台灣風味。
RISE Kitchen 抹茶紅豆麻糬月餅
無獨有偶呢間由前主播黃婉曼開嘅餐廳，今年月餅都加入麻糬呀！禮盒兩款月餅分別係金沙奶黃同抹茶紅豆麻糬口味，都用咗日本麵粉、紐西蘭有機牛油製作，後者更選用宇治抹茶粉同十勝紅豆。略嫌抹茶香被紅豆甜味蓋過，但麻糬煙韌口感非常加分。
Ralph’s Coffee 咖啡流心月餅
相信唔少時尚達人都有聽過呢間咖啡店，今年佢哋更大玩中西合璧，推出兩款香港獨家嘅月餅口味﹕奶黃流心同咖啡流心月餅，後者仲要係以自家品牌嘅咖啡豆做原材料。BTW，個餅盒造型係仿傚品牌經典咖啡美食車啊，又幾靚。
Miss Marble 珍珠奶茶流心月餅
台灣珍珠奶茶大熱，呢間主打流心蛋糕嘅甜品店推出全新珍珠奶茶流心月餅啊！粉紅色雲石紋加金色包裝盒已經先加分，奶茶餡用咗Twinnings 茶葉，仲有一粒粒煙韌珍珠，味道唔會太甜。不過如果流心效果可以更彭拜就好喇。
聖安娜 金月奶皇月餅
呢間連鎖餅店今年推出全新嘅金月奶黃月餅。同以往嘅金沙流心奶黃月餅唔同嘅係，呢款加咗用鹹蛋黃蓉特製嘅「金月」，令奶黃嘅鹹甜味更加出，奶黃控不妨試試！
皇玥餅藝 流心薑汁白蓮蓉月餅
呢間傳統餅藝店雖然係今年先開業，但由前半島酒店師傅兼半島奶皇月餅始創者主理，所推出嘅月餅點都有啲保證。師傅仲改良咗奶黃月，令餅皮同餡結合唔會分散，令口感更豐富。另外，舖頭亦推出流心系列，包括有流心芝麻、貓山王榴槤同薑汁白蓮蓉等，喺室溫情況下都有緩緩流心效果。
奧卑利 蘇式月餅
傳統月餅食得多，傳統蘇式月餅又食過未？蘇式月餅餅皮係鬆脆嘅酥皮，奧卑利特別推出咗一款鹹味同一款甜味，鹹嗰款以碎豬肉，青蔥，生薑、豉油、老抽和白胡椒粉做餡，而甜嘅則係自家製紅豆蓉製成嘅豆沙餡。
四喜 迷你蛋黃豆沙月餅
唔少朋友應該都食過呢間港式餅店嘅皇牌奶皇月餅，佢哋今年新推出迷你蛋黃豆沙月餅呀，豆沙入口即溶，仲夾有鹹蛋黃。另外，伯爵茶味嘅奶皇月餅亦重出江湖！
國金軒 玫瑰醬洛神花奶皇月餅
想食月餅又怕食得太多會肥會膩，迷你月餅就啱晒。國金軒今年新出一盒四味「精品四藝迷你月餅」，有金沙、陳皮柑桔、黑芝麻蛋黃，同埋首創嘅玫瑰醬洛神花奶皇月餅。以全天然嘅洛神花涼果同玫瑰醬調配奶皇餡料，甜中帶有微微花香，女生啱晒。
祝奇餅 燕窩月餅
呢間曲奇餅店今年推出嘅「祝．亮麗」月餅禮盒就啱晒女士們啦﹗禮盒有荔枝燕窩、玫瑰燕窩金柚桂花燕窩三隻口味，味道清甜，再加上可以美容養顏嘅燕窩，貪靚嘅女生們千萬唔好錯過呀﹗
黃大仙中心 曲巧奇月餅
黃大仙中心今年請嚟t前agnès b DELICES總廚，製作全球首創嘅「曲巧奇」月餅。月餅造型特別，勁似馬卡龍咁，非常精緻可愛。月餅口味有霹靂果、鹹蛋黃、榴槤同抹茶，夾埋曲奇脆脆嘅口感，真係夠晒特別呀﹗
豚王 月光寶盒奶黃月餅禮盒
真係估你唔到，呢間日式拉麵店今年都推出月餅禮盒，用精美木盒裝住四款唔同口味：原味奶黃、竹炭芝麻奶黃、紅豆奶黃，同抹茶奶黃月餅各一件，原來係代表店裡面四款人氣拉麵：豚王、黑王、赤王同翠王呀！
雪糕系
Häagen-Dazs 盈．伴月
夏天熱辣辣，想試下冰涼啲嘅月餅？Häagen-Dazs今次新推出嘅「盈．伴月」，月餅以朱古力脆皮做外層，入面再加入巴西莓、藜麥、椰子、南瓜等材料，食落勁有層次。再配埋酸酸地嘅乳酪雪糕，真係fresh上加fresh！
榴槤系
duria™ 貓山王榴槤流心月餅
榴槤控今年又可以大飽口福啦﹗呢個嚟自馬來西亞嘅榴槤品牌，除咗原味貓山王榴槤冰皮月餅之外，今年仲推出埋貓山王翡翠榴心月餅﹗傳統月餅嘅外表，切開竟然綠色嘅？原來係用咗班蘭葉，連埋香濃椰汁同蓮蓉一齊製作，最中間就梗係主角，曉流心嘅馬來西亞貓山王榴槤！
DURIAN HILL 榴槤冰皮月餅
呢個連續兩年獲得「世界榴槤錦標賽」冠軍嘅榴槤品牌，今年推出嘅榴槤冰皮月餅，選材自馬來西亞嘅貓山王榴槤，100%榴槤果肉餡啊，榴槤味勁重﹗黑色嘅榴槤月餅則配上竹炭冰皮，十分型格﹗
抹茶系
北川半兵衛商店 伝説。 抹茶月餅
呢間嚟自日本嘅造茶老店，已經有150年嘅造茶歷史，而今年更首推抹茶月餅，用日本直送嘅高級抹茶粉，茶味甚為香濃，抹茶控去美食博覽嘅話可以掃下貨。
Valérie 流心宇治抹茶月餅
呢間深受抹茶控歡迎嘅本地人氣網店，之前出嘅宇治抹茶月餅大獲好評，而今次更升級加入流心內餡！流心餡散發住濃郁嘅茶香，食落仲有淡淡嘅回甘，建議微微加熱後食嘅口感仲正。
A*Treat 特濃宇治抹茶流心月餅
呢個brand由旅遊達人Benedict袁學謙開設，今年第一年推出月餅，抹茶控嘅朋友要試下佢哋嘅特濃宇治抹茶流心月餅喇，用上倫敦IG大熱嘅Matchæologist宇治抹茶粉製作，微甜嘅奶黃流心中有陣陣甘醇嘅抹茶香，翻熱後食更好。另外伯爵奶茶檸檬夾心月餅亦帶有茶香同柑橘香，鮮檸檬夾心餡則使月餅冇咁甜膩，反而仲有啲小清新嘅感覺。
望月 抹茶紅豆月餅
本地奶黃月餅品牌今年新出兩款抹茶系列月餅——流心抹茶月餅同抹茶紅豆月餅。前者採用宇治丸久小山園抺茶，茶香回甘，一切落去茶香就撲鼻而來；而後者就用咗北海道十勝紅豆，豆味較一般紅豆濃郁，中和返抺茶嘅甘味，甜中又帶點甘，味道非常有層次。
中村藤吉本店 X A-1 Bakery 升呢版抹茶焙茶月餅
抹茶控當然唔可以錯過嚟自日本京都宇治嘅抹茶老店嘅出品啦，佢哋再次推出禮盒，月餅用品牌100%日本嚴選茶粉製作，今年更加入全新特別嘅烘焙方法，令抹茶同焙茶嘅茶香更濃郁芳香，回甘亦更明顯！禮盒有丸十抺茶奶皇月餅、丸十焙茶奶皇月餅各兩件。
朱古力系
agnès b. CAFÉ 朱古力月餅
呢個品牌今年個月餅禮盒好鬼靚呀！係燈籠設計嚟，仲有開燈裝置添。其中呢盒紅色嘅係「花團錦簇巧克力月餅燈籠禮盒」，以經典朱古力做基底，設有唔同口味，包括杏仁牛奶、開心果、士多啤梨同埋柚子等，果仁、水果控都可以各自滿足。
Schoggi Meier 銀河系朱古力月餅
呢個朱古力品牌今年大玩gimmick﹗一反件件一樣大細嘅傳統，以「七星伴月」為主題；較大嘅「月亮」係意大利咖啡配72%黑朱古力加杏仁脆脆，而七色「星球」則係黑朱古力軟心脆脆、熱情果芒果、摩卡咖啡等唔同口味。造型亦一反傳統，望落真喺幾似閃閃發光嘅星球咁，靚到一個點。
Sift x Or Tea 法式月光朱古力月餅
呢間法式餅店聯乘Or Tea推出朱古力月餅，造型有別傳統月餅，好似一件精緻嘅法式西餅咁；而內餡有杏仁焦糖牛奶朱古力，同格雷伯爵黑朱古力兩種口味，前者鬆脆，後者清香，各有特色，隨盒仲有一罐普洱黑茶，食完之後飲返啖茶消消滯~
龍島 荷花朱古力月餅
食個月餅都可以好有詩意？呢款荷花朱古力月餅點睇？一嚟帶有「中秋賞荷」嘅意境，二嚟仲意味住「幸福圑圓」。4片花瓣混合咗杏仁糖碎、乾果同埋73%純黑朱古力，而中間嘅黃色蛋黃就係紅莓榛子碎同藍莓乾，味道豐富，內外都甜入心頭啦﹗
Venchi 薑配椰絲雙層朱古力月餅
月餅都唔一定膩嘅，可以有啲清新嘅。好似呢兩款由Gelato及朱古力品牌推出嘅朱古力月餅咁，薑配椰絲雙層朱古力月餅，上層薑搭白朱古力醬，甘醇幽香，下層椰絲配黑朱古力，微甜清新；至於伯爵茶雙層朱古力月餅，則有淡淡茶香。
Godiva Chocolatier 朱古力月餅禮盒
呢間朱古力名店都推出月餅，有唔同果仁同朱古力嘅配搭：香烤腰果綠茶朱古力、香脆杏仁黑朱古力、香烤芝麻松子仁朱古力，同鹽味胡桃牛奶朱古力共四款口味。當中綠茶嘅茶香唔算好突出，但比一般朱古力月餅嚟得清新，而香脆杏仁黑朱古力非常香口。
素食系
The Cakery X 莊館 川椒朱古力月餅
隨住素食文化愈嚟愈盛行，素食月餅亦大有巿場。一向主打cupcake嘅The Cakery聯乘中菜府莊館推出四件裝嘅手工純素月餅禮盒：口味包括黑白芝麻、玫瑰雜莓、香芒薑黃同埋獨家口味：川椒朱古力。加入四川二荊條辣椒粉，中和咗黑朱古力原有嘅濃澀外，仲有絲絲辛辣快感。四款月餅全部都冇任何麩質、乳製品、蛋、精製糖、防腐劑和人工色素啊。
香積廚素食館 玫瑰蓮藕流心月餅
奶皇月餅都可以係純素？冇錯。呢間素食店今年首度推出純素奶皇月餅，利用亞麻籽代替蛋，連同植物油、椰漿等天然材料，製作出全素奶皇餡，曲奇皮酥脆，內餡綿密。幾款中最特別嘅應該係玫瑰蓮藕味，粉紅色餅皮係紅菜頭製成，再以玫瑰花瓣醬混合蓮藕粉製餡，有陣陣清幽花香；而奶皇流心仲特意以稀少糖製作減低甜度。
卡通系
美心 Marvel系列流心奶皇月餅
Marvel粉絲最開心，今年又有Marvel系列啦~ 一盒集齊晒7個3D Q版超級英雄，Ironman嗰盒仲可以撳掣，然後佢對眼、心口反應器同埋掌心都會發光㗎！粉絲對眼都會跟住發光！月餅係流心奶皇月嚟，上面仲印有A字徽章添。
美心 迪士尼公主 奶皇月餅音樂禮盒
呢個月餅盒好靚啊，唔止有白雪公主、貝兒、茉莉同花木蘭四個經典迪士尼公主喺上面，而且仲係個雙層旋轉音樂盒嚟！一路聽住《阿拉丁》主題曲嘅純音樂，一路食住印有公主皇冠嘅奶皇月餅，今個中秋夠晒童話~
東海堂 Pokemon奶皇月餅
出嚟啦比卡超！喺月圓嘅中秋夜，pokemon就進化成為精靈球造型嘅奶皇月餅喇，每盒月餅仲會送個Tote bag添，粉絲梗要收藏。
奇華 Sanrio果味乳酪奶皇月餅
Hello Kitty、My Melody、PC狗同AP鴨嘅粉絲就mark住呢盒果味乳酪奶皇月啦。兩款果味分別係香橙同士多啤梨，有粒粒橙皮同士多啤梨乾㗎食到，乳酪奶皇帶微酸，感覺冇咁膩。隨禮盒仲會附送個環保袋添。當然，有私心淨係偏愛某一個嘅，單件裝都有啊。
榮華餅家 P助兔兔流沙奶黃月餅
呢間連鎖中式餅家今年就推出卡娜赫拉的小動物流沙奶黃月餅，無論鐵罐、月餅定贈送嘅環保袋上都係印住可愛嘅P助同粉紅兔兔！一盒四件流沙奶黃月餅，有香濃鹹蛋黃香。
榮華餅家 B.Duck流沙奶黃月餅
呢間餅店另外仲推出B.Duck小黃鴨流沙奶黃月餅，用雙層木製櫃桶裝住四件B.Duck流沙月餅，食完可以擺喺房或者Office枱面擺嘢，夠實用！另外亦附送手提便當袋，Fans必買啦。
A-1 Bakery Snoopy四款口味月餅
Snoopy Fans就可以考慮買呢盒月餅，裡面有LED燈可以將紙盒變Snoopy燈籠！仲送別注版手提袋。而月餅就有黑芝麻、日式紫薯、伯爵紅茶，同提拉米蘇四款口味各一件。如果只係想淺嘗，禮盒以外亦有單個裝。
英記餅家 Snoopy奶黃月餅
Snoopy去埋登陸月球？呢個登月禮盒內有三款奶黃月，奶黃、芝士奶黃同埋黑松露奶黃，松露口味嗰款香氣最濃。每個月餅上面仲有Snoopy嘅嘜頭呢~ 唔知各位粉絲會唔會望住好耐都唔捨得切落去呢？
靚盒系
Van Gogh SENSES 香茶月餅禮盒
佢哋嘅包裝年年都好鬼靚，今年都唔例外。「杏福團圓」系列設計取材自梵高名畫《盛開的杏樹》，盒面仲有立體凹凸感，文青必愛。有樣都有內涵，香茶月餅禮盒內，除咗有奶香蛋濃嘅奶皇月餅，仲有不含咖啡因嘅花茶：「藍莓之吻」、「仲夏向日葵」，前者清香後者甜香，食完月餅飲返啖茶，消滯啊。
Sugarfina 青花瓷月餅糖果禮盒
呢個嚟自美國嘅糖果店首次推出中秋系列，禮盒以中式青花瓷為設計靈感，優雅得嚟手工紙花仲可以亮燈啊！而「花樽」裡面有喺香港手工製作嘅奶黃月餅兩件，首次喺香港推出而且用香檳小熊軟糖以 Dom Pérignon 年份香檳製作嘅香檳小熊家族軟糖一盒，同大受歡迎嘅爆炸糖朱古力一盒，保證無論大人定小朋友都會鍾意。
都爹利會館 限量版燈籠月餅禮盒
有月餅點可以冇燈籠？呢個月餅禮盒就同時化身成為時尚燈籠啦，採用全息影像物料(holographic)製作，開埋LED燈，又型又靚，唔止個盒會發光，就連身邊親友嘅眼都會發光。盒內有8件手工奶皇月餅，以經典食譜炮製，奶皇甜香。
Vive Cake Boutique Artistry Mooncake Gift Box
講到靚包裝又點少得呢間以精品蛋糕而聞名嘅蛋糕店，今年佢地推出八件裝「Artistry Mooncake Gift Box」，外型粉紅色夠晒少女心，揭開盒頂會彈出寓意團圓嘅滿月同星光，有埋品牌標誌獨角獸。禮盒以抽屜式設計，鼓勵大家重複使用，好環保～Gift Box包含招牌「酥皮金沙奶皇月餅」同全新嘅「酥皮流心奶皇月餅」，仲有台灣有機茶包，食多兩件都無問題。
Starbucks 星巴克月餅禮盒
呢間連鎖咖啡店每年推出嘅月餅禮盒都好靚，今年設計就以星巴克美人魚同湛藍星空做主題，紙盒仲可以開燈變成月亮燈盒！而裡面就有朱古力咖啡麻糬月餅同伯爵紅茶麻糬月餅，分別以朱古力咖啡同伯爵紅茶呢兩款飲品為靈感，再加入香軟麻糬增加口感層次，無論係送禮定自私食都咁啱！
唐人館x上海灘 限量版月餅
中秋送禮想好好睇睇，咁呢個「月光寶盒」就啱晒啦﹗一打開個盒就係閃閃發光嘅中秋夜景紙雕，夠晒浪漫。食完月餅，留返個盒裝飾屋企，哇~呢啲咪叫情調囉﹗入面係傳統蛋黃白蓮蓉月餅，大大隻鹹蛋黃。真係好睇又好食呀﹗
禮盒系
PAUL LAFAYET 榛子牛奶朱古力+ Calisson
以法式焦糖燉蛋贏得人氣嘅法式甜點店，趁住中秋亦推出中秋禮盒。一盒12粒法國手造百年皇室甜點Calisson，包括有青檸薄荷、桑莓抹茶、梨等6款口味，另外仲有法國人手製造榛子牛奶朱古力同埋限量版手工精製嘅蓮花圖案骨瓷瓷器，用嚟送禮夠晒得體！
Johnnie Walker X 富臨飯店 西班牙火腿月餅+Blue Label
對於無時無刻都想飲酒嘅酒鬼嚟講，呢個由Johnnie Walker同富臨飯店聯乘推出嘅禮盒就啱晒。基本版有兩個帶有微微鹹香兼有啖啖夏威夷果仁嘅西班牙火腿月餅，加一支Blue Label。而升級版更有多罐質感軟腍而味道香濃嘅紅燒乾鮑添。一啖月餅一啖酒，月光下帶點微醺。
Tea WG 茗茶月餅
呢間新加坡茗茶品牌今年推出嘅月餅充滿茶香，以獅城早餐茶、可可茶、密斯特茶及抹茶為主題，夾返傳統嘅蓮蓉餡，真係夠晒特別。最後飲返啖茶，識歎一定咁歎！
Durian Capital 貓山王禮盒
想特別啲，唔送月餅唔送楊桃，中秋送榴槤都有得諗啊。有間榴槤專賣店新開冇耐，主力賣來自馬來西亞自家果園種植嘅貓山王，仲特設中秋禮盒裝。型格黑色禮盒內有兩pack甘甜偏甜嘅貓山王，仲附埋冰袋同手套，好貼心，送禮一流。