早前介紹過好多酒店級、新派月餅同榴槤月餅，今次介紹10間嘅有賣月餅嘅小店畀大家，價錢經濟啲之餘有唔少都好有特色㗎。如有小店推出可以刻名嘅原木禮盒月餅、手工月餅禮盒、芋泥酥皮月餅、手工花花月餅、清新茶味月餅、麻糬月餅及松露奶皇月餅等～
原木禮盒月餅 Gusteau's
好有心思嘅月餅禮盒！原木禮盒系列打造兩個裝嘅木盒盛載全新口味嘅迷你月餅，供應埋免費刻名服務，送禮最啱。禮盒可以自選兩個口味嘅月餅，靈活度好高，包括蛋黃蓮蓉月餅、蛋黃豆沙月餅、迷你奶黃月餅、黑芝麻軟心月餅及凍頂烏龍桂花月餅，無論鍾意傳統定新口味都有得揀。
手工花花月餅 繁花餅房
女仔一定好鍾意嘅手工月餅，造型呈牡丹花狀，店主以韓式裱花技術純手工製作，成份以無油韓國荳蓉、日本製白荳粉配上原隻漏油蛋黃，加上慢火一小時烘焗而成，蛋黃餡香濃得嚟又唔太膩，真係啱晒女仔食！
精品手工月餅禮盒 Creo by Brentwood
呢間店舖一向好支持本地創作，今年中秋夥拍香港藝術家Zoie Lam推出精品手工月餅禮盒。三款月餅口味都好，包括麥蘆卡蜂蜜奶黃，選用紐西蘭麥蘆卡蜂蜜，甜蜜清新。另外仲有斯里蘭卡伯爵茶及濃香咖啡流心，前者口感軟滑茶香味濃；後者餅皮及奶黃餡料均混合咗阿拉比卡咖啡，咖啡香氣好突出。
清新茶味奶黃月餅 SAGE
平時唔好甜嘅朋友，可以試下呢個品牌推出嘅清新茶味奶黃月餅系列。有三個口味分別係桂花烏龍茶味奶黃、玫瑰烏龍茶味奶黃及高山碳焙烏龍茶味奶黃，三款嘅茶味同奶黃餡料都配合得好好，好適合送畀長輩呀。
煙韌麻糬月餅 Mirai bakery
除咗招牌奶皇月餅，仲有推出全新口味雙拼麻糬月餅，包含紫薯麻糬及金莎奶皇麻糬。麻糬煙韌軟糯，紫薯口味香氣好濃郁又唔會太甜；金莎奶皇蛋黃味都幾突出，味道香甜，最重要係呢種軟滑又煙韌嘅口感真係好新鮮呀。
松露奶黃月 Dolce Dolce Kitchen
意大利食材網店推出嘅松露奶黃月，特意由意大利挑選最新鮮嘅原粒黑松露，每粒月餅用上3克新鮮意大利黑松露製成，黑松露味超濃厚，配埋奶皇餡層次豐富，性價比好高呀。除咗黑松露，仲有特濃朱古力奶黃、伯爵茶奶黃及焙茶玫瑰紅豆等口味㗎～
手工朱古力軟心酥月餅 JOL Cacao 
本地一間Bean to Bar朱古力店，由烘焙可可豆至朱古力成品均為全手工製作。今個中秋首次推出朱古力月餅，呢個手工朱古力軟心酥月餅外層好酥脆，可可味香濃又唔太甜，套裝入面除咗軟心酥，仲有伯爵手工朱古力麻糬酥或香片手工朱古力麻糬酥、手工原粒榛子朱古力及4片手工片裝朱古力。
圖:芋泥酥皮月餅 moontone
呢款上年極速賣斷市嘅芋泥酥皮月餅返嚟啦～分別有芋頭蛋黃及芋泥麻糬兩個味，芋泥全手工製作，前者係濃厚芋泥混合蛋黃嘅鹹香味，好有層次感；後者綿滑嘅芋泥配上煙韌麻糬，無論味道定口感都好豐富呀。
圖:日式濃茶味流心麻糬月餅 Twinkie cookies 
鍾意飲茶嘅朋友必試！日式濃茶味流心麻糬月餅有四個口味，分別係抹茶、烏龍茶、玄米茶及伯爵茶朱古力，足足有四層餡料，仲會流心同拉絲，茶味香濃，食晒成件都無問題～
圖:官方網站
國王月餅 Shaz Confections
聽到個名都覺得有氣勢！呢款國王月餅有鹹蛋奶黃及貓山王榴槤兩個口味，鹹蛋奶黃香濃而不膩，貓山王榴槤好濃郁。如果屋企有焗爐焗一焗返熱會仲好食呀。
圖:
文: Yanica