中秋仲有一個月左右就到喇，仍然心思思唔知買邊間月餅？不如睇吓今期介紹嘅特色口味月餅，試吓新意思都唔錯呀～
茉莉花茶奶黃月餅/焦糖海鹽咖啡奶黃月餅 奕居
以「月下旅人」為主題嘅月餅禮盒，記錄咗香港呢個城市嘅精髓同風情～口味有陳皮豆沙月餅（素）、麥芽糖醇低糖蛋黃白蓮蓉月餅、茉莉花茶奶黃月餅同焦糖海鹽咖啡奶黃月餅；當中茉莉花茶奶黃月餅帶淡淡花嘅清香，焦糖海鹽咖啡奶黃口味多變，層次感豐富。
焙茶果仁月餅 Pâtisserie Jane
標榜手工製作嘅人氣甜品店，堅守無添加防腐劑同低糖原則喺傳統月餅上稍作變奏，以現代手法重新演繹經典口味。「茗茶月餅」禮盒內焙茶果仁月餅幾特別，帶烘焙炭香嘅靜岡焙茶曲奇皮包裹住雜錦果仁碎，如南瓜籽、杏仁、合桃、腰果、芝麻等，濃厚茶味同堅果香一拍即合。
法式焦糖冰皮月餅二重奏 香港嘉里酒店
酒店將經典冰皮月餅全新演繹！呢個禮盒包括法式焦糖黑刺榴槤冰皮月餅，以及法式焦糖椰子冰皮月餅，廚師會即席以火槍將表面燒至金黃焦脆，法式焦糖面層同內層綿密幼滑嘅黑刺榴槤蓉、椰子蓉嘅口感形成強烈對比。溫馨一提呢款限定變奏版冰皮月餅只限酒店自取～
橙花紅茶月餅 FORTNUM & MASON
月餅禮盒包含以品牌三款經典茶葉製作而成嘅茶香奶黃月餅。皇室紀念茶月餅以標誌性紅茶為主軸，同麥芽嘅香氣、蜂蜜甜蜜交織；另外兩款就以清新花香為主，分別係帶有濃郁橙花幽香嘅橙花紅茶月餅，以及用玫瑰花瓣點綴，散發淡淡花香嘅玫瑰包種茶月餅。
《夏宮》×《春水堂》聯乘月餅禮盒包括夏宮三十年陳皮豆沙月餅，以及春水堂鐵觀音黑糖珍珠奶茶月餅各三件，後者一入口帶黑糖同奶茶香氣，珍珠又為月餅增添煙韌口感。
皇玥．啟勵慈善低糖奶黃月餅 皇玥
以奶黃月餅聞名嘅糕點專門店，今年特意推出「皇玥．啟勵慈善低糖奶黃月餅（4件裝）」，利用天然麥芽糖醇，控制糖分於5%之內，同時保持奶黃餡料軟綿幼滑，散發住濃郁牛油香味同鹹蛋黃嘅鹹香，好味到唔似低糖月餅！
傳統餅家同本地精品咖啡品牌合作推出咖啡奶皇月餅禮盒，盒內載有「軟心咖啡奶皇月」、「軟心紅桑子奶皇月」各兩個，以及獨一無二嘅掛耳咖啡包。軟心咖啡奶皇月咖啡味超香濃，而軟心紅桑子奶皇月則注入酸甜嘅澳洲紅桑子醬，醇厚咖啡中滲出清甜酸味，食多少少都唔會膩。
自家製素食冰皮月餅 緻素坊
素食嘅朋友同樣有選擇～呢間餐廳以創新素食聞名，今個中秋節推出三款全新自家製嘅素食冰皮月餅，包括十勝紅豆味、香滑抹茶味同貓山王榴蓮味，而三式冰皮月餅禮盒就可以一次過試晒三款口味！
抹茶茅台酒心月餅 國金軒
米芝蓮推介食府推出嘅尊尚月餅禮盒系列，全新抹茶茅台酒心迷你月餅嚴選頂級抹茶粉作桃山皮，再配以世界著名三大蒸餾名酒之一嘅茅台酒心相互輝映，茶香同酒香配搭得好好，層次豐富。
開心果榛子及海鹽焦糖生榨椰子拿鐵月餅 花玥
今年兩款全新月餅口味包括開心果榛子味，同埋海鹽焦糖生榨椰子拿鐵味，前者每一啖都係濃郁可口嘅堅果味道，濃厚滿足；後者將椰子同咖啡兩者巧妙融合，咖啡香氣中帶有淡淡椰香，口感綿密細膩，加入海鹽焦糖令味道倍添層次，創新又滋味。
文：Yanica
編：Cathy
