之前有介紹過唔同類型嘅食用菌如黑木耳、姬松茸、牛肝菌及羊肚菌等嘅營養價值同功效畀大家，今期介紹返幾間喺香港有呢類真菌菜式食嘅餐廳，中、西、日式都有，有平有貴，等大家食得好味、營養又健康。
松露海景餐廳 松藝館 
來自法國嘅過江龍餐廳，主打松露及唔同嘅菇菌類菜式，仲可以邊食飯邊欣賞維港海景，人生一大享受呀。食物方面由餐前麵包、餐湯、主菜到甜品，都加入咗松露嘅元素。餐包配上松露牛油同cream cheese；野菌濃湯及牛肝菌濃湯都非常濃郁，有淡淡松露油香氣；主菜意大利飯.蟹肉.松露都好推薦，味道濃郁又鮮味，就連甜品同咖啡如法式焦糖燉蛋同流心朱古力撻都加入松露㗎～
圖: 松露主題意式餐廳 Cielos
位於銅鑼灣嘅意式fusion餐廳，由意大利人同香港人親自主理，最近推出咗一系列嘅松露菜式，用上米芝蓮星級廚師推介、全球No.1松露食材品牌Sabatino Tartufi。另外亦有多種意大利麵、薄餅、扒類及菇菌類菜式選擇。松露菜式推介Gnocchi Ai Quattro Formaggi Con Tartufo Umbro，Gnocci薯糰煙韌Q彈，醬汁加入松露、迷迭香、白汁及多種芝士製作，好creamy。Baked lobster with mushroom creamy sauce都好出色，焗龍蝦配濃厚蘑菇汁，好有層次。
圖: RheaChim
西式素食主題 野玩田店
主打都市健康田園風嘅西餐廳，有唔少菜式都加入真菌類煮成。如牛仔肉配野菌闊條意大利麵同黑松露炒蛋意大利麵，前者麵質煙韌彈牙，醬汁蘑菇味好出；後者意粉上面係一塊厚厚嘅黑松露煎蛋，松露份量啱啱好，唔會蓋過蛋香。芝士蘑菇釀雞翼都值得一試，外皮煎得香脆，一咬開係油香、芝士香同蘑菇香，味道好豐富。
圖: fz.eatenz、輕鬆豆*HappyMealFamily
龍鳳松茸雙灼餃 餃掂手工餃子雲吞專門店
人氣餃子專門店，全部餃子都係人手製作，粒粒都好足料飽滿，供應煎餃及湯餃，亦有好多特色口味，真菌類餃子都有幾款！如招牌至尊松茸豬肉餃，一咬開會見到原片松茸，果然真材實料。另外龍鳳松茸雙煎餃有晒黑松露同白松露兩款，黑松露相對濃味，白松露就清淡啲，肉味會更突出。另外仲有雲耳椰菜豬肉餃同野生松茸素餃～
圖: MGani
米芝蓮星级中菜廳 欣圖軒
榮獲米芝蓮二星嘅粵菜食府，可以邊食中菜邊欣賞維港景色，真係人生一大享受。佢哋都有供應唔少菇菌類嘅菜式，如黑松露窩貼大蝦，將蝦膠釀入多士中炸，面層嘅蝦膠充滿鮮味又爽甜，多士金黃香脆又唔油膩，黑松露令味道更有層次。另外仲有花膠燉羊肚菌竹絲雞，超足料雞味好香濃，羊肚菌吸收晒雞湯味道呀。
圖: 牛肝菌拉麵 麺屋武蔵 武骨相傳
來自東京嘅沾麵過江龍專門店，必試牛肝菌雞白湯沾汁麵，雞白湯用雞肋熬煮咗8小時，雞香味好突出，口感黏黏地，飲落清甜又唔膩，加埋濃郁嘅牛肝菌，香氣撲鼻。雞肉鮮嫩唔乾身，肉味香濃，菇菌亦好爽口，加上自家特製嘅坑紋麵，爽滑彈牙，沾入雞白湯一齊食好索湯～
圖: 上水人氣雞湯麵 鳳鳴居
一間喺上水區好有人氣嘅雞湯麵專門店，姬松茸雞湯麵同蟲草花雞湯麵都好受歡迎。前者湯底味道鮮甜，濃郁有雞味，帶有姬松茸嘅香氣，就算飲晒成碗都唔會口渴。雞肉方面好嫩滑，姬松茸入口脆嫩。而蟲草花雞湯味道清甜，蟲草花份量都唔少，係養生之選呀。
圖: 松露主題茶飲 Golden Diamond Truffle
以松露為主題嘅茶飲店，每一款茶飲都加入松露，夠晒特色～人氣之選包括松露果仁奶蓋雜錦草莓汁沙冰，同松露西班牙皇室黑鑽朱古力，前者味道清爽松露味突出，後者朱古力味好香濃，同濃厚嘅松露好夾。另外仲有松露牛角窩夫等供應，加入松露片、松露粉、花生醬同煉乳，松露控必試！
圖: bellywongs
文: Yanica
【OHealth!】 食用真菌篇
5種常見食用真菌介紹及功效 (傳送門按此)
輕鬆食譜跟住整 迷你蘑菇漢堡 （奶素/純素） (傳送門按此)
5大貼士！野生食用菌店主教路 野生菌唔可以用水洗？ (傳送門按此)
歪歪實試！尖沙咀松露主題餐廳 邊道菜式最濃味？ (傳送門按此)
歪歪實試！尖沙咀新派中菜 大推松茸羊肚菌海膽燴飯 (傳送門按此)
營養師拆解坊間菇菌類零食 標榜全天然/營養豐富 就真係健康？ (傳送門按此)
