1. 青流
長洲竟有青樓？No，此青流不同彼青樓。離開weekend幾乎旺過旺角嘅一帶，搵到呢個由牆壁貼滿外國oldish黑膠同poster，至到旁邊販賣嘅服飾，都一樣嘅hippie嘅「青流之地」，起碼一半分係食環境氣氛。但如果同樣行呢種風格嘅，邊有地方靚得過mum's not home? 你哋話係唔係先？😚
裝修hippie，而嘢食主要以泰國及東南亞嘢食為主，其實只有幾款。所以幾乎必嗌之一係手撕海南雞飯，賣相成座山咁唔錯㗎。手撕雞唔會撕得太幼或太大件，肉質幾嫩算係咁啦。甜醬油同辣椒汁係亮點味道不錯，亦早已淋好咗令件事更靚更震撼。
由於友人唔食另一必嗌同catchy之作嘅芒果煎糯米飯嘅糯米飯，結果試咗佢最愛嘅香蕉巧克力pancake。友人話塊皮無泰國食咁薄同滑，我覺得幾好啦都不錯。
🉐RamenGorRating -- 🍜Optional
2. 南丫海景民豐海鮮酒家
呢篇成年前應該要寫嘅食評，今日望返啲相，兩條友，榕樹灣，民豐吹吹風，擺明嚟俾人劏，但錢可以換到嘅浪漫，洗嚟又何妨？
叫咗成隻碟橙到爆嘅梅子蒸羔蟹同最豪氣嘅芝士焗龍蝦，同場加映將功用發揮極致嘅炸饅頭。蟹多膏，梅子汁味道幾特別，唔覺周圍有得食。芝士creamy我哋都覺得味道幾好，龍蝦都新鮮，當然氣氛好對成件事好有幫助。所以，浪漫有時係要花費下，但花費咗，係咪就會浪漫？Well，good old days就係good old days。
🉐RamenGorRating -- 🍜🍜CAN try
3. Deer Horn
相比起長洲南丫島，梅窩可以話係純渡假區無咩買無咩行。其實，有個沙灘有得租單車踏下有路可以行下，夠啦，唔使咁多花臣。仲有，最重要有好餐廳！今次我喺梅窩搵到兩間好野，其中一間hearty小店，希望為食客呈現最authentic尼泊爾菜。
佢哋嘅Nepali curry beef brisket，正到一個點。帶嗆口的微辣辣味夠持久但just fit令正常人都接受到，而佢哋嘅咖哩偏深色，估計應該係薑，turmeric，brown sugar同coconut milk嘅比例，比普通印度咖哩有所不同。質地比較稠身，然後多一種special touch同出面食唔到嘅flavour，總之係好味。但最正嘅其實係炆得夠腍又有咬口嘅牛腩，完全係牛腩嘅完美示範，我直頭將呢樣嘢同店員反映添。
另外追加咗可能係世界上海拔最高嘅犀牛奶所製成嘅炸芝士球。唔講唔知尼泊爾係製作犀牛芝士嘅始祖。脆炸嘅表面食得出有dukkha spice，內裡芝士混入薯蓉口感比較結實同有彈性。不要問旁邊啡色醬是什麼，只要信，個醬真心正。
🉐RamenGorRating -- 🍜🍜🍜🍜MUST try
4. 津津食店
今趟梅窩行特登揀星期六日，就係為咗呢碗淨係星期日先供應嘅蟹肉海鮮湯檬。適逢嗰個星期日係8號風球（就係嗰個風平浪靜嘅8號波），津津食店仍開我實在覺得感恩，一於食埋先走人。我唔知因乜呢碗粉咁巴閉淨係做一日，但總之佢就好食。淨係嗰幾粒蟹肉肉碎粒已經係我食過最好食，全因混入大量蟹肉相當足料。鮮紅湯底食唔出有番茄味，反而海鮮味好出，配湯檬都算幾索汁，確實唔錯。係隻迷你蟹無乜蟹肉，搭件乾掙掙豬肉不如搭件豬頭骨好過。但仍然，我都會推薦人哋星期日入嚟一試呢碗嘢。朝早十點幾係最佳時機啦，知無？
🉐RamenGorRating -- 🍜🍜🍜SHOULD try
※上述內容純屬作者個人意見，不代表本網立場。※