以蝦湯拉麵馳名嘅一幻拉麵，早前喺灣仔開設首間海外分店後，話咁快第二間分店已經開業！選址尖沙咀海港城，地方大得多，而且有近90個座位，仲有一排海景吧枱位，望住個海景食拉麵都幾爽！

新店有成2,000呎，有吧座亦有兩人卡位，比灣仔店坐得更舒適。而且尖沙咀店係開放式廚房，可以見住師傅煮麵，更似身在日本拉麵店。

除咗有齊招牌蝦湯拉麵，仲有新店限定嘅特濃蝦汁叉燒拌麵，係創辦人林直樹專誠為此店而設，全球首次登場，日本都冇得食架！

特濃蝦汁叉燒拌麵 $88

拌麵精髓係以蝦湯、蝦湯熬製而成嘅蝦汁，用攪拌機打碎隔渣，再加蝦油、蒜蓉、蝦味醬油製成，有柯打再煮至杰身，再拌勻麵條。

拌麵用上粗麵冇得自己揀，比煮一般拉麵長半分鐘，大約4分鐘口感軟硬度就啱啱好。師傅將蝦汁同麵條拌勻後加入叉燒碎、葱花、蝦酥同埋半隻溏心蛋就上得枱，就將所有材料及底部的醬汁再撈勻就食得。

麵條沾上濃郁蝦汁，蝦味恰到好處，而且食起來冇湯麵咁膩，亦唔會過鹹，食到尾仍然有汁，麵條唔會硬成一餅，開飯仔認為大熱天時食拌麵絕對好過食湯麵。

Fans可以買埋開幕紀念禮盒，係限量版兒童餐具，包括一盒拉麵、圍巾、迷你版招牌拉麵瓷碗同湯匙，食拉麵唔怕整污糟啦！

一幻拉麵

地址：尖沙咀海港城海運大廈地下OTG 59號舖

文、相、片：Perrins