海鮮鍋又有新食法啦！荃灣最近就新開咗間海鮮鍋專門店，招牌係海鮮山同龍蝦山，望落真係成座山咁澎湃。佢嘅食法就比較特別，火鍋上層就係炒過嘅海鮮，下層就係火鍋，真係一次過滿足兩個願望啊！

龍蝦山($698)

龍蝦山嘅頂層係參考四川干鍋做法。洗淨海鮮後先拎去低溫過水，咁就可以保持鮮味同唔會過韌。之後就先將龍蝦走油，剩底嘅油就用嚟炒海鮮，因為龍蝦炒嘅過程中會出油，所以其他海鮮都會吸收埋龍蝦油香。海鮮選用加拿大波士頓龍蝦，肉質會較美國嘅鮮甜同爽口，另外仲有澳洲鮑魚、日本大元貝、黑虎蝦、貴妃蚌同蕃薯蜆。

海鮮山($598)

海鮮山嘅主角就換咗做菲律賓黃膏奄仔蟹，肉質較滑而且蟹味香濃，而且蟹嘅炸粉經過特別調配，蟹殼特別鬆脆，連殼都可以食埋。其他做法就同龍蝦山差唔多。海鮮有日本大元貝、海中蝦、蕃薯蜆、貴妃蚌同珍珠蚌。如果鍾意食辣的話都可以加辣，咁就會有種食麻辣干鍋嘅風味。

食哂海鮮後就可以飲湯同打邊爐啦！底層就加咗娃娃菜、超甜粟同海鮮湯，湯底會同時有龍蝦或蟹油香、蒜香同海鮮嘅鮮甜，而且一啲都唔油。

大分縣和牛($238)

配料方面特別推薦大分縣和牛，和牛由日本直送，特意選用牛肩甲位置，肥瘦程度啱啱好，最適合用嚟打邊爐，呢款和牛並唔係入口即溶果種，反而有口感，牛香味重，淥大約五秒等佢粉紅色果陣食就最啱。

特級安格斯肥牛($188)、西班牙黑毛豬($48)

安格斯肥牛肉質比較軟腍，西班牙黑毛豬爽口，而且仲好重肉味！

脆炸魚皮($38)、脆炸響鈴($38)

呢兩款都係負責人私心推薦，響鈴豆味香，炸魚皮無論即食同浸湯都咁好食～

海鮮山醉辣火鍋

地址: 荃灣二陂坊25號地下

文、相、片：Yanica