食過五月糭之後，除咗要收埋冬天衫仲要開始諗下父親節去邊度食大餐慶祝喇。想考順爸爸一齊擦餐勁首選當然係自助餐，等開飯仔幫大家介紹以下六間酒店餐廳嘅父親節自助晚餐，無論係想任食海鮮定名貴菜式，到外國主題都有得揀！
 

海鮮美饌之選
 

城景閣　海膽‧龍蝦‧海鮮自助晚餐

位於油麻地呢間餐廳嘅自助餐今次以新鮮韓國海膽同波士頓龍蝦炮製各款美食，好似海膽龍蝦焗生蠔、海膽龍蝦海葡萄伴冷稻庭烏冬、亞拉斯加三文鰈魚卷海膽黃金燒等，回本選擇夠多！另外仲有紐西蘭生蠔、鱈場蟹腳、荷蘭藍青口等，連甜品都有即叫即製海膽龍蝦流心芝士撻嘆，自問最愛食海鮮嘅你唔好錯過呀。
 

帝景軒　「鮮味之享」自助晚餐

荃灣呢間酒店餐廳一樣以海鮮做主題，而且從海鮮種類到烹調方式都非常多元化，例如有空運到港嘅肥美法國膏蟹同鮮甜凍龍蝦做冷盤，然後主菜就有芝士煙肉焗生蠔同泰式炒青口等選擇。燒澳洲牛肉眼、意式香草鮮茄燴羊膝、鹽燒牛舌等亦係推介。最後記得試埋佢地深受歡迎嘅馬卡龍，或者清新嘅檸檬撻做甜品。
 

名貴食材之選
 

御花園咖啡室　「蠔」情暖意父親節自助晚餐

父親節想食豪啲？呢間銅鑼灣區嘅自助餐廳或者可以幫到你，佢地嘅父親節自助晚餐主打即開美國生蠔，其他日式美食都相當有睇頭。好似清酒味噌帶子、30吋燒海膽醬蟹肉壽司卷同32吋岩鹽燒原條三文魚等。另外松葉蟹腳、開邊龍蝦、麵包蟹、藍青口等亦係任食。最後食埋櫻花白桃啫喱餅同火焰雪山等特色甜品就完滿喇。
 

2+2 Café　鮑魚龍躉海鮮自助晚餐

講到名貴食材，中菜嘅代表又點少得鮑魚？沙田呢間餐廳6月嘅自助餐以鮑魚同龍躉做主題。先飲返碗鮑魚紅棗桂圓煲雞養下生，另外仲有鮑魚乾鍋雞同鍋燒鮑魚雞粒炒飯等熱食。另一方面鐘意食龍躉嘅話就有「一魚兩食」嘅兩儀龍躉球同惹味嘅辣子蔥爆龍躉腩等選擇。當然亦唔少得各款冷盤、刺身、壽司同甜品等美食啦。
 

味遊外國之選
 

咖啡亭　越滋味‧泰滋味自助晚餐

身處香港一樣可以味遊越南同泰國！呢間尖沙咀區嘅餐廳今次推出越泰美食自助餐，必試推介包括即煎越南虎蝦同泰式鑊炒咖哩蟹，惹味刺激。仲有越式蒸海斑、烤比目魚配冬蔭公醬、椰汁焗海鮮、泰式香辣鳳爪沙律等美食，同豐富海鮮冷盤、刺身、壽司等任食。甜品特別推介燕窩燉蛋白，甜度得宜一清味蕾。
 

add@Prince　印度美食巡禮自助晚餐

尖沙咀呢間酒店餐廳今次以印度美食做主題，由印籍大廚主理，夠地道之餘仲特別加入印度沙律選擇，食過清新沙律開胃之後就可以開始試勻各款印度特色咖喱同烤肉，例如馬沙拉芝士咖哩、牛油雞肉、印式烤羊肉、惹味原隻烤雞等等。而冰鎮海鮮，包括即開生蠔、青口，翡翠螺、淡水螯蝦同刺身、壽司等亦不容錯過嘅回本位。

文：Cathy