被譽為「經典意菜鼻祖」嘅意大利餐廳VA BENE曾於中環蘭桂芳扎根超過二十年，係香港人氣數一數二嘅意大利菜，其後遷至上海，最近回流香港於九龍塘重新開業！新店採用地中海風作室內設計概念，半開放式設計令採光度更佳，食物方面廚師團隊以傳統意菜為基礎，糅合其他歐陸菜嘅烹調手法，重新設計更合港人口味嘅新菜式，另外餐廳午市仲供應超抵食嘅半自助餐！

餐廳於平日供應$198半自助餐，包一份自選主菜、甜品及飲品，仲有出面嘅自助bar可以任食海鮮、燒牛肉、沙律及甜品，呢個價錢嚟講真係好抵食！假日都只係$268咋。

VA BENE特色烤雞 ($488)

廚師先將黑松露醬同鴨肝撈勻，配上自家製嘅百里香，迷迭香及鼠尾草味道嘅海鹽，均勻咁塗於雞隻嘅皮同肉之間，並以真空方法醃製24小時，然後連同新鮮百里香烤焗。新鮮出爐嘅烤雞香氣撲鼻。侍應會先捧出原隻烤雞畀食客相機食先 ，然後將烤雞去骨，咁就可以直接食到超嫩滑嘅雞肉喇～

波士頓龍蝦扁意粉 ($268)

選用波士頓龍蝦，預先將多隻龍蝦蝦殼熬成濃汁，再加上龍蝦蝦膏製成龍蝦汁，味道更香濃鮮甜。之後將意粉及濃汁炒成乾身，意粉吸收晒醬汁味道，一入口會感受濃濃龍蝦香。而且製作過程中特地加入鯷魚炒香，鹹香嘅鯷魚令龍蝦鮮味更突出。

北海道海膽自家製意粉 ($238)

醬汁加入海膽製成，好creamy！面頭仲加咗原塊北海道海膽，絕對滿足到一眾海膽控。

意式番茄醬海鮮薄餅 ($188)

意大利菜又點少得薄餅？薄餅每日新鮮製作，要試出餐廳龍與鳳，當然要試吓一啲經典菜，意式番茄醬海鮮薄餅集齊五至六款時令海鮮，配搭鯷魚及新鮮羅勒葉，輕盈又清新。

松露和牛薄片($168)

甚有法式經典前菜牛肉他他影子嘅松露和牛薄片，特意選用嫩滑嘅和牛牛柳部份，而且刻意切得稍厚增添口感，最後配上雞蛋碎及新鮮黑松露片，入口軟滑香氣濃郁。

Afternoon Tea Set ($268)

唔至半自助餐抵，連Afternoon Tea Set都好抵食！二人用三層架下午茶都只係$268，鹹食包括龍蝦牛角酥、自家製蟹餅、三文魚卷等；甜食就有紅絲絨蛋糕、柚子芝士蛋糕、意式奶凍及馬卡龍等！

海洋浪花 Marine Splash($68)、玉蝶戀花 La Farfalla($118)

VA BENE Italiano 

地址: 九龍塘達之路80號又一城1樓L1-34號舖

文、相、片: Yanica