平時去主題公園除咗玩之外，食都好重要，餓住冇力玩嘛。海洋公園最近同名廚陳國強合作，頭炮推出嘅就係呢個限時同限量供應嘅春季六道菜菜單，揉合咗中西嘅特色，再結合川、魯、粵、淮陽四地菜系嘅精髓同技巧，食材以環保海鮮作為主打，聽落都幾吸引嘅，睇埋相先！

頭盤係牛油果阿拉斯加長腳蟹沙律、燒汁日本帶子、木煙燻鴨蛋同麻辣澳洲鮑角嘅四色頭盤。長腳蟹同帶子都好鮮甜，而鮑角辣辣地更加惹味！

京燒泰國老虎大蝦嘅醬汁用上四川豆瓣醬同蘇州酒釀去調製，好香濃，隻蝦仲要輕輕炸過，鮮味更加突出。

黑虎掌菌羊肚菌配竹笙桃膠燉烏雞湯，聽個名就知補。用明火燉成7、8個鐘，啖啖鮮菌香味，飲完湯記得要食埋啲湯料啊。

而主菜就係芙蓉金湯意式風乾火腿鱸魚卷，同鹿兒島豚肉叉燒拼宮廷茶香法國春雞，前者以低溫處理，仲用南瓜湯取代傳統嘅中式上湯嚟清蒸蛋白，無論條魚定啲蛋都好滑；後者雞肉鮮嫩，仲有陣陣茶香。

最後點少得甜品？一碟拼盤有三款甜品，中西、冷熱嘅款式都有，包括流沙金球、驢打滾同紅桑子奶凍。其中，奶凍係用北海道3.6牛奶製嘅，口感幼滑，奶香味中滲有紅桑子嘅酸酸甜甜。

期間限定：即日 至 6月底

海龍王餐廳
地址：黃竹坑海洋公園夢幻水都海洋奇觀

文、相：Kar