鍾意飲茶嘅朋友仔注意喇，呢間連鎖咖啡店新開茶飲吧！觀塘分店新設Teavana™ Bar，開放式設計可以畀大家觀賞沖調過程。亦新增八款香港獨有嘅創意現代茶飲，包括棉雲泡沫鮮果雪漾星冰茶、日出抹茶、荔枝伯爵紅茶等。亦可以自選自己喜愛嘅原片茶葉茶，口味配搭多元化。
 

Starbucks Teavana™ Bar繼去年喺銅鑼灣旗艦店首次登場後，嚟緊將會進駐九龍區！觀塘apm店聽日(25/7)會增設Teavana™ Bar，而尖沙咀iSQUARE店亦會喺26/7開設香港獨家Teavana™ Kiosk，方便大家Grab & Go。兩間店將會提供多款鮮果茶、特調茶飲、鮮奶茶等等，其中八款仲係香港獨有！
 

（左）日落洛神花茶（$39），（右）日出抹茶（$39）

兩杯茶飲都有亮眼嘅漸層賣相，分別以日落同日出嚟比喻。日落洛神花茶用鮮橙片、橙汁配梳打水，最後倒上紫色嘅洛神花茶。而日出抹茶就以日本抹茶為底，加芒果熱情果汁，最後以菠蘿片嚟模仿太陽升起。兩款都加入熱帶水果元素，好啱炎炎夏日飲呀。
 

棉雲泡沫鮮果雪漾星冰茶（$45）

棉雲泡沫其實係用脫脂奶高速打成綿密輕盈嘅奶泡，配果茶增加口感層次又會覺得膩。鮮果茶底有兩款口味，可以揀菠蘿或士多啤梨配搭品牌雲霧綠茶。而且可以自己選擇甜度，想幾Refresh你話事。
 

（左）蜜桃青檸薄荷雲霧綠茶（$45），（右）荔枝伯爵紅茶（$45）

創意唔單止係指口味配搭，喺沖調方式上亦有新方法。蜜桃青檸薄荷雲霧綠茶糅合調酒概念，雲霧綠茶底加薄荷葉、青檸、蜜桃汁等Shake勻，配底部帶果肉嘅蜜桃啫喱，最後加上蘇打水同青檸。而荔枝伯爵紅茶用原粒荔枝配搭有佛手柑香嘅伯爵紅茶，頂層加入蝶豆花茶形成天然夢幻漸層。
 

  

蜜糖香蕉亞麻籽（$45）

知道香港人越嚟越著重健康，呢款飲品就特別用蜜糖、乳酪粉，同有機亞麻籽粉製作，皆因亞麻籽高纖又有助抗氧化，香蕉亦可以幫手舒緩緊張情緒！茶底可以喺雲霧綠茶、英式紅茶、洛神花茶、薄荷香檸綠茶，同白茶當中選擇，好似開飯仔呢杯就係洛神花茶底。
 

日本梅子青檸紅茶（$45）

糅合英式紅茶同日本梅子嘅創意配搭，裡面亦用咗梅子蜜糖醬、新鮮青檸，同梳打水調配，令紅茶變得酸甜清新。
 

另外亦有原片茶葉茶供應，熱飲可選擇一款茶包或特調茶，而凍飲就可以揀兩款Teavana™茶包！例如可以以比較清淡嘅果莓白茶配搭無咖啡因嘅甘菊花茶增加香味。
 

Starbucks Teavana™ Bar
地址：觀塘觀塘道418號創紀之城五期(apm)2樓15號舖

文、相、片：Cathy