呢排天氣實在係太熱喇！同朋友聚會但想避開酷暑，去室內地方嘆下午茶就啱晒。最近唔少酒店餐廳都推出夏日主題下午茶，大多以水果為主，夠晒清新。

目錄

甜蜜仲夏下午茶 Lobby Lounge 

供應多款清新鹹甜美點，包括香濃嘅雙重朱古力榛子蛋糕、清新嘅士多啤梨紅莓撻同酸甜嘅檸檬柚子可麗露。最吸睛係新出嘅Häagen-Dazs x Pierre Hermé馬卡龍雪糕，可以升級任食架！結合咗幼滑嘅雪糕同香脆嘅馬卡龍，入口外脆內軟滑，雪糕亦可中和馬卡龍嘅甜膩。以為馬卡龍淨係可以做甜品？原來整鹹點都一樣得，呢度嘅廚師團隊發揮創意，創造多款馬卡龍鹹點，包括煙三文魚慕斯、布拉塔芝士意大利火腿慕斯、鴨肝醬同牛油果山羊芝士口味，好特別。

供應時間：6月1日至8月31日

夏日 Fiesta! 週末下午茶自助餐 普慶餐廳

今個夏日佢哋以熱帶風味為主題，以清新鮮果炮製豐富鹹甜點，啱晒大胃王！特別推介龍蝦鮮蝦小漢堡，香脆嘅麵包夾入彈牙飽滿嘅龍蝦肉及蝦肉，啖啖都係鮮味；仲有富亞熱帶風味嘅香濃椰汁蝦、椰汁咖喱蟹、菠蘿魚湯、菠蘿海鮮炒飯同雞肉蔬菜串燒等～甜品就唔可以錯過即叫即製嘅鐵板炒雪糕配新鮮雜莓，簡直係冰火雙重享受。另外仲有以鮮果製嘅甜品，如火龍果撻、番石榴慕斯蛋糕、龍眼杞子茶凍、山竹啫喱、熱情果芝士餅及紅桑子希臘乳酪撻等，全部都係充滿夏日氣息嘅水果呢，好fresh～

供應時間：2023年6月3日起（星期六、日及公眾假期）下午3時15分至5時15分

莓果亮肌下午茶 星幕  

除咗有靚靚下午茶食，仲有護膚品送呀。呢個「Cielo x Eurobeauté莓果亮肌」下午茶有5款甜品同5款鹹點，甜品有蝶豆花草莓戚風卷、藍莓忌廉泡芙、朱古力棒、馬卡龍、雜莓撻，全部都唔太甜，雜莓含有豐富維他命C，滋潤美肌抗氧化；鹹點就有自家烘焙紅莓英式鬆餅、意大利風乾火腿露筍卷、紫薯巨蛋、蟹肉芒果迷你漢堡包配芥末沙律醬及野菌寶盒，選用健康有營嘅食材，食完一啲都唔罪惡。每位客人仲可獲贈價值$2,494之禮遇，實行又食又拎～

供應時間：2023年6月1日至8月31日(不適用於6月18日)下午3時15分至5時30分

春日瑰麗下午茶 THE BUTTERFLY ROOM

鍾意甜品嘅朋友一定聽過呢間餐廳嘅大名，佢哋設計咗全新嘅餐單去喚醒大家嘅味蕾。甜點都以新鮮時令水果製作，如芒果青檸泡芙，酸酸甜甜嘅cream配上香脆泡芙，成個感覺好清新。仲有士多啤梨丹麥酥、玫瑰士多啤梨蛋糕、變奏經典風味嘅法式雲呢嗱布甸、反轉蘋果批以及特濃朱古力撻，甜品控見到一定心心眼。下午茶更會配搭19款以春日為主題嘅獨家Mariage Frères香茗，解膩一流！

供應時間：中午12時至下午5時30分 

文: Yanica