各位大圍友，或者鍾意去大圍踩單車嘅朋友注意啦！呢間主打可以自由配搭嘅手工漢堡店最近嚟到大圍開分店，方便各位嚟Grab & Go。首推最新嘅龍蝦蟹肉蒜檸沙律漢堡，凍嘅龍蝦肉味道爽甜食落夠Refreshing。生酮友同素食者一樣可以配搭出啱自己口味嘅生酮漢堡或者素食漢堡呀。
 

新店手繪招牌係藝術家katolone同書法家chanoiying合作嘅作品

Nomad Burger大圍新店位於積運街，附近就有單車徑。而店名Nomad係遊牧人咁解，以自由為理念，漢堡都好似車仔麵咁可以畀大家揀想食嘅包、配料同醬汁，想要幾多層自己話事。
 

加拿大海膽炸蠔漢堡（$118）

本來係今年三月新出嘅期間限定口味，因為大受歡迎所以最近決定成為常駐漢堡。主角係原片加拿大海膽同三件吉列日本蠔，前者Creamy鮮甜，後者外脆內嫩、趁熱食仲有爆汁效果！加上烘過嘅牛油漢堡（Brioche）、羽衣甘藍同自家調配嘅海膽蛋黃醬，整體鮮味十足又唔會太膩。
 

龍蝦蟹肉蒜檸沙律漢堡（即將推出，$98）

夏天天氣熱到無胃口？呢款即將推出、期間限定凍食嘅漢堡就啱晒啦，裡面嘅龍蝦肉同蟹肉都係凍嘅，波士頓龍蝦肉厚爽甜，裡面嘅一絲絲蟹肉同樣充滿鮮味。加埋口感軟滑嘅牛油果蓉，同用蒜蓉、檸檬、薄荷製作嘅蒜檸沙律醬一齊食，感覺非常清新。
 

生酮芝士雙層牛肉漢堡（$86起）

知道各位生酮友平時食漢堡都要走麵包好麻煩，呢度就有用杏仁、牛油、海鹽等製作嘅生酮麵包畀大家揀，口感略硬，勝在烘完都幾香脆。連醬汁都有生酮蛋黃醬揀，係用初榨橄欖油、檸檬汁、雞蛋製作。建議大家配料揀安格斯牛肉，手打肉扒肉味香濃又多肉汁！細細聲提埋大家，飲品方面生酮友可以揀無糖梳打水或者Coca-Cola Plus呀。
 

三重松露薯條（單點$38，或漢堡+$28連飲品）

薯條同樣高質，三重松露指醬汁有黑松露醬同白松露油，最後撒上黑松露粉，聞落同食落都有好濃郁嘅松露香呀！薯條比坊間嘅再粗身啲，外脆內棉。而且醬汁仲加咗蛋黃同檸檬調味，少少酸味會令人一條接一條咁食晒都唔覺。
 

Nomad Burger
地址：大圍積運街2-8號海福花園地下2號舖

文：Cathy
相、片：Tom Li